హైదరాబాద్: డాక్టర్ బి.ఆర్. అంబేద్కర్ సచివాలయంలో(Dr. B.R. Ambedkar Secretariat) ఇండో-ఫ్రెంచ్ చాంబర్ ఆఫ్ కామర్స్ అండ్ ఇండస్ట్రీ (ఐఎఫ్‌సిసిఐ) నిర్వహించిన ఉన్నత స్థాయి రౌండ్ టేబుల్ సమావేశంలో ఐటి, పరిశ్రమల దుద్దిళ్ల శ్రీధర్ బాబు ఇండో-ఫ్రెంచ్ సహకారాలను మరింతగా పెంచుకోవడం ప్రాముఖ్యతను నొక్కి చెప్పారు. ఇంజనీరింగ్, ఆర్టిఫిషియల్ ఇంటెలిజెన్స్ (Artificial intelligence), క్లీన్ ఎనర్జీ, తయారీ వంటి రంగాలలో పెట్టుబడి అవకాశాలను చర్చించడానికి ఈ రౌండ్ టేబుల్ సమావేశంలో తెలంగాణ ప్రభుత్వం నుండి సీనియర్ అధికారులు, ప్రముఖ ఫ్రెంచ్ వ్యాపార ప్రతినిధుల బృందం పాల్గొన్నారు.

ప్రభుత్వ-ప్రైవేట్ భాగస్వామ్యం (Public-Private Partnership) నమూనా కింద అభివృద్ధి చేయబడుతున్న 30,000 ఎకరాల గ్లోబల్ ఇన్నోవేషన్ హబ్- తెలంగాణలోని ప్రతిష్టాత్మకమైన ఫ్యూచర్ సిటీ ప్రాజెక్ట్‌లో అవకాశాలను చురుకుగా అన్వేషించాలని శ్రీధర్ బాబు ఐఎఫ్‌సీసీఐ(Indo French Chamber of Commerce and Industry) దాని సభ్య సంస్థలను కోరారు. తెలంగాణను ఆవిష్కరణ, స్థిరత్వం, అధునాతన మౌలిక సదుపాయాలలో ప్రపంచ నాయకుడిగా నిలబెట్టాలనే ముఖ్యమంత్రి రేవంత్ రెడ్డి దార్శనికతకు అనుగుణంగా ఈ ప్రాజెక్ట్ ఉందని ఆయన హైలైట్ చేశారు. తెలంగాణ ఒక ప్రాధాన్యత గల పెట్టుబడి గమ్యస్థానంగా అవతరించిందని, గత 18 నెలల్లో రూ.3 లక్షల కోట్లకు పైగా పెట్టుబడులను ఆకర్షించిందని మంత్రి పేర్కొన్నారు. 

గత ఏడాది హైదరాబాద్ 70 కొత్త గ్లోబల్ కెపాబిలిటీ సెంటర్లను (జిసిసి) స్వాగతించింది. ఇది రాష్ట్ర అనుకూల వ్యాపార విధానాలు, పాలన నమూనాకు ప్రతిబింబమని మంత్రి పేర్కొన్నారు. టీజీ ఐపాస్ ను ఏఏఐతో అనుసంధానం చేసేందుకు చర్యలు తీసుకుంటున్నామని మంత్రి పేర్కొన్నారు. సనోఫీ, మోనిన్, సఫ్రాన్, క్యాప్‌జెమిని, డస్సాల్ట్, టెలిపెర్ఫార్మెన్స్, ఒపెల్లా హెల్త్‌కేర్ వంటి అనేక ప్రముఖ ఫ్రెంచ్ కంపెనీలు ఇప్పటికే తెలంగాణలో ఏరోస్పేస్, ఐటీ, ఫార్మాస్యూటికల్స్, ఫుడ్ ప్రాసెసింగ్ వంటి రంగాలలో బలమైన ఉనికిని ఏర్పరచుకున్నాయి. ఫ్రెంచ్ వ్యాపారాలను క్లీన్ ఎనర్జీ, గ్రీన్ మొబిలిటీ, స్మార్ట్ హెల్త్‌కేర్, డిజిటల్ గవర్నెన్స్, భవిష్యత్తుకు సిద్ధంగా ఉన్న విద్య, వ్యవసాయ-ఆవిష్కరణ, అభివృద్ధి చెందుతున్న సాంకేతికతలు వంటి అభివృద్ధి చెందుతున్న రంగాలను అన్వేషించమని శ్రీధర్ బాబు ప్రోత్సహించారు.