నిజామాబాద్‌లో గంజాయి ముఠా హల్‌చల్‌ 

హైదరాబాద్: గంజాయి స్మగ్లింగ్‌కు పాల్పడుతున్న ఒక ముఠా శుక్రవారం అర్ధరాత్రి తనిఖీల సమయంలో ఎక్సైజ్ అధికారుల వాహనాన్ని తమ కారుతో ఢీకొట్టి నిజామాబాద్ నగరం శివారులో కలకలం సృష్టించింది. ఈ ఘటనలో గజల సౌమ్య అనే మహిళా ఎక్సైజ్ కానిస్టేబుల్‌కు తీవ్ర గాయాలయ్యాయి. ఆమెను చికిత్స నిమిత్తం నగరంలోని ఒక ప్రైవేట్ ఆసుపత్రికి తరలించారు. ఆమె పరిస్థితి విషమంగా ఉందని వైద్యులు తెలిపారు. ఈ దాడి తర్వాత, పోలీసులు వాహనాన్ని వెంబడించి మైనర్ సహా ఇద్దరు గంజాయి స్మగ్లర్లను అరెస్టు చేశారు. వారి వద్ద నుండి సుమారు 2.5 కిలోల ఎండు గంజాయిని స్వాధీనం చేసుకున్నారు. నిందితులు నిర్మల్ జిల్లాకు చెందిన వారిగా గుర్తించారు. పోలీసులు కేసు నమోదు చేసి దర్యాప్తు చేస్తున్నారు.