దోసెడు నీళ్లు పోసి

పిలిస్తే పలికే అందరి బంధువు

మనసారా ఆహ్వానిస్తే

పరవశించి పోయే ఆకుపచ్చని సాయం

మనసుండాలే గానీ

ప్రకృతి రాఖీ కట్టని తోబుట్టువు

ప్రేమిస్తే

విరగబూసే పూలచెట్టు

లాలిస్తే చంక దిగని చంటిపాప

తల్లికి సేవ చేసుకున్నట్టు

యువరాణిలా చూసుకోవడం

మన ధర్మం

వనాలు నాటితే

నీడ దొరుకుతుంది

అడవుల్ని కాపాడితే వర్షం లభిస్తుంది

వానంటే ఆశ ఎండిపోయిన 

గొంతులో కురిసే

అమృతధార

వాన.. మానవలోకం కలలు కనే మెతుకు 

పంట ప్రకృతి పచ్చగా ఉంటే

చుట్టూ ప్రాణవాయువు కంచె కడుతుంది

కాలుష్యపు కోరలు తాకి ఓజోన్ గాయపడ్డది

నిప్పులుకక్కుతూ సూర్యుడు

తాండవమాడకముందే

పుడమి మీద పచ్చందం పోగు చేసుకుని

రక్షా కవచం కుట్టేసుకుందాం

ఛిద్రమయి పోతున్న భవిష్యత్తు మీద

దృష్టి జారి పోనివ్వని ఒప్పందమవుదాం !

మానవ ప్రపంచం

గుండెపై చెయ్యి వేసుకొని

హాయిగా నిద్దుర పోయే ఊపిరి పాటవుదాం

గాజుబొమ్మ బాగున్నప్పుడే

భద్రంగా చూసుకుందాం!

 గజ్జెల రామకృష్ణ