రానున్న రెండు రోజుల్లో రాష్ట్రవ్యాప్తంగా భారీ వర్షాలు

హైదరాబాద్: నైరుతి రుతుపవనాలు తెలంగాణలోకి ప్రవేశించాయి. దీనివల్ల ఈ సీజన్‌లోనే మొదటిసారిగా విస్తృతమైన వర్షాలు కురుస్తాయని భారత వాతావరణ శాఖ (IMD) తెలిపింది. అలాగే, మే, జూన్ ప్రారంభం వరకు రాష్ట్రవ్యాప్తంగా కొనసాగిన తీవ్రమైన ఎండల నుంచి ఉపశమనం లభిస్తుందన్న ఆశలు చిగురించాయి. రుతుపవనాలు తెలంగాణలోని కొన్ని ప్రాంతాలకు విస్తరించాయని, రాబోయే రెండు మూడు రోజుల్లో రాష్ట్రమంతటా విస్తరించే అవకాశం ఉందని వాతావరణ శాఖ పేర్కొంది.

తెలంగాణ రాష్ట్రంలో ఇవాళ, రేపు భారీ వర్షాలు కురిస్తే అవకాశం ఉందని అధికారులు పేర్కొన్నారు. ఇవాళ రంగారెడ్డి, వికారాబాద్, సంగారెడ్డి, మెదక్, కామారెడ్డి, మహబూబ్ నగర్ జిల్లాల్లో అక్కడక్కడ భారీ వర్షం కురుస్తుందని, ఉమ్మడి ఆదిలాబాద్, కరీంనగర్, వరంగల్, నల్గొండ, రంగారెడ్డి, హైదరాబాద్, కామారెడ్డి మెదక్ జిల్లాల్లో మోస్తరు వర్షం పడిందని సూచన. రేపు వికారాబాద్, మహబూబ్ నగర్, నారాయణపేట, గద్వాల జిల్లాలకు భారీ వర్షంతో పాటు ఎల్లో హెచ్చరికలు జారీ చేసిన వాతావరణ శాఖ. 

తెలంగాణలోని కొన్ని ప్రాంతాల్లో భారీ వర్షం

గత 24 గంటల్లో సూర్యాపేట, రంగారెడ్డి జిల్లాల్లోని కొన్ని ప్రాంతాల్లో భారీ వర్షపాతం నమోదైంది. సూర్యాపేట జిల్లాలోని మట్టంపల్లిలో 8 సెం.మీ వర్షపాతం నమోదు కాగా, రంగారెడ్డి జిల్లాలోని మహేశ్వరంలో 7 సెం.మీ వర్షపాతం నమోదైంది. సోమవారం అత్యధికంగా ఖమ్మంలో 17.7 మి.మీ వర్షపాతం నమోదు కాగా, ఆ తర్వాతి స్థానాల్లో సూర్యాపేట 16.2 మి.మీ, రంగారెడ్డి 11.5 మి.మీ ఉన్నాయి. జూన్ 1 నుండి జూన్ 8 వరకు రాష్ట్రవ్యాప్తంగా నమోదైన వర్షపాతం 16.6 మి.మీగా ఉంది. సాధారణ వర్షపాతం 22.9 మి.మీతో పోలిస్తే, రాష్ట్రంలో 28 శాతం వర్షపాత లోటు నెలకొంది.

ఉత్తర జిల్లాల్లో కొనసాగుతున్న వడగాల్పుల పరిస్థితులు

రుతుపవనాలు ప్రవేశించినప్పటికీ, ఉత్తర తెలంగాణ జిల్లాల్లో అధిక ఉష్ణోగ్రతలు కొనసాగుతున్నాయి. కుమురం భీమ్ జిల్లాలోని రెబ్బెనలో రాష్ట్రంలోనే అత్యధికంగా 42.8 డిగ్రీల సెల్సియస్ ఉష్ణోగ్రత నమోదైంది. ఆ తర్వాతి స్థానాల్లో మంచిర్యాల (42.7 డిగ్రీల సెల్సియస్) మరియు పెద్దపల్లి (42.5 డిగ్రీల సెల్సియస్) నిలిచాయి. హైదరాబాద్ నగరంలో అత్యధిక ఉష్ణోగ్రత చార్మినార్ వద్ద 38.8 డిగ్రీల సెల్సియస్‌గా నమోదైంది. నగర సగటు గరిష్ట ఉష్ణోగ్రత 36.9 డిగ్రీల సెల్సియస్‌గా నమోదైంది.

రాబోయే ఏడు రోజుల వర్ష సూచన

జూన్ 9 నుండి జూన్ 15 వరకు తెలంగాణ వ్యాప్తంగా తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురుస్తాయని భారత వాతావరణ శాఖ (IMD) అంచనా వేసింది. రాబోయే మూడు రోజుల పాటు పలు జిల్లాలకు ఎల్లో అలర్ట్ జారీ చేయబడింది. అక్కడక్కడ ఉరుములు, మెరుపులు, గంటకు 40-50 కిలోమీటర్ల వేగంతో ఈదురు గాలులతో కూడిన భారీ వర్షాలు కురుస్తాయని ఆ శాఖ హెచ్చరించింది.

హైదరాబాద్‌లో, ముఖ్యంగా సాయంత్రం మరియు రాత్రి వేళల్లో ఆకాశం సాధారణంగా మేఘావృతమై ఉండి, వర్షం లేదా ఉరుములతో కూడిన జల్లులు కురుస్తాయని IMD అంచనా వేసింది. ఇదిలా ఉండగా, అమరావతి నుంచి బదిలీపై వచ్చిన కె. నాగారత్న స్థానంలో, ఎఫ్.ఎస్. స్టెల్లా జూన్ 8న హైదరాబాద్‌లోని IMD వాతావరణ కేంద్రం అధిపతిగా బాధ్యతలు స్వీకరించారు.