ఢాకా: బంగ్లాదేశ్‌లోని(Bangladesh) గాజీపూర్‌లో అరటిపండ్ల విషయంలో తలెత్తిన వివాదం కారణంగా ఒక హిందూ వ్యాపారిని ఒకే కుటుంబానికి(Hindu businessman) చెందిన ముగ్గురు వ్యక్తులు కొట్టి చంపారని స్థానిక మీడియా వెల్లడించింది. గాజీపూర్ జిల్లాలోని కాళిగంజ్ ప్రాంతంలో శనివారం జరిగిన సంఘటనకు బంగ్లాదేశ్‌లో హిందువులపై ఇటీవల జరుగుతున్న హింసాకాండకు సంబంధం ఉందో లేదో ఇంకా నిర్ధారించబడలేదు. మరణించిన 55 ఏళ్ల లిటన్ చంద్ర ఘోష్, ‘బైశాఖి స్వీట్‌మీట్ అండ్ హోటల్’ యజమాని అని ఓ పత్రిక నివేదించింది.

కాలిగంజ్ పోలీస్ స్టేషన్(Kaliganj Police Station) ఆఫీసర్-ఇన్-ఛార్జ్ జాకిర్ హుస్సేన్ ప్రకారం, హత్యలో ప్రమేయం ఉందనే అనుమానంతో ఒకే కుటుంబానికి చెందిన ముగ్గురు వ్యక్తులు – 55 ఏళ్ల స్వపన్ మియా, అతని భార్య 45 ఏళ్ల మజేదా ఖాతూన్, వారి కుమారుడు 28 ఏళ్ల మాసూమ్ మియాలను అదుపులోకి తీసుకున్నారు. పోలీసులు తెలిపిన వివరాల ప్రకారం, మసూమ్‌కు అరటి తోట ఉంది,  అందులో నుండి ఒక అరటి గెల కనిపించకుండా పోయింది.

వెతుకుతున్నప్పుడు అతను ఆ అరటి గెలను లిటన్ హోటల్‌లో గుర్తించాడు. దీనిపై ఇరుపక్షాల మధ్య వాగ్వాదం జరిగింది. నిందితులు లిటన్‌ను పిడికిళ్లతో గుద్ది, కాళ్లతో తన్నడంతో అతను కిందపడి అక్కడికక్కడే మరణించాడని పోలీసులు తెలిపారు. లిటన్ కుటుంబం చెప్పిన ప్రకారం, మాసూమ్ ఉదయం 11:00 గంటల ప్రాంతంలో హోటల్‌కు వచ్చాడు. ఆ సమయంలో, ఒక చిన్న విషయంపై అతడు హోటల్ ఉద్యోగితో వాగ్వాదానికి దిగాడు. ఆ తర్వాత, మాసూమ్ తండ్రి, తల్లి అక్కడికి వచ్చి గొడవపడ్డారు. పోలీసులు ఈ ఘటనపై దర్యాప్తు చేస్తున్నారు.