-నిజామాబాద్ మూడవ కల్లు డిపో అక్రమాలపై ఉత్కంఠ 

-డీసీఓ ఆఫీసు సహకారంపై ఆరోపణలు 

-డీసీఓ ఏం చేసేనో  వీళ్ళ మద్దతుతోనే పదేళ్లుగా అక్రమాలు 

-విచారణ నిజాయితీపై ప్రశ్నలు 

నిజామాబాద్, నవంబర్ 30 (విజయ క్రాంతి): నిజామాబాద్ నగరంలోని మూడవ కల్లు డిపో (థర్డ్ టోడీ డిపో) లో జరిగినట్లు ఆరోపణలు ఎదుర్కొంటున్న కోట్ల రూపాయల అక్రమాలు ఇప్పుడు జిల్లా ఉన్నతాధికారుల దృష్టికి చేరాయి. డిపో సభ్యులు, కార్మికులు ఇచ్చిన ఫిర్యాదు మేరకు విచారణకు ఆదేశిస్తూ జిల్లా కలెక్టర్ వినయ్ కృష్ణారెడ్డి తీసుకున్న నిర్ణయం సంచలనంగా మారింది. అయితే, ఈ విచారణ బాధ్యతలను జిల్లా సహకార అధికారి (డీసీఓ) కు అప్పగించడంపై తీవ్ర విమర్శలు, అనుమానాలు వ్యక్తమవుతున్నాయి.

విచారణాధికారిపైనే ఆరోపణలు..

డిపో యాజమాన్యంపై వస్తున్న ప్రధాన ఆరోపణలు ’దొంగ లెక్కలు’ తయారు చేయడం, కోట్ల రూపాయలు స్వాహా చేయడమే. ఈ అక్రమాలకు పరోక్షంగా లేదా ప్రత్యక్షంగా కో ఆపరేటివ్ అధికారులే వత్తాసు పలికారని వారే తప్పుడు ఆడిట్ రిపోర్టులు ఇచ్చారని డిపో సభ్యులు బహిరంగంగా ఆరోపిస్తున్నారు.

ప్రధాన ఆరోపణ:  డిపో యాజమాన్యం సభ్యులకు, డైరెక్టర్లకు ఆడిట్ పత్రాలను ఇవ్వకుండా, లోలోపల లెక్కలు కట్టి కోట్ల రూపాయల ప్రజాధనాన్ని కాజేశారని ఫిర్యాదులో పేర్కొన్నారు.

అనుమానాలు ఎందుకంటే? అక్రమాలకు ఆడిట్ చేసిన కో ఆపరేటివ్ అధికా రులకే ఇప్పుడు విచారణ బాధ్యతలు అప్పగించడం. ‘దొంగలనే విచారణకు నియమిం చినట్లుగా‘ ఉందని పలువురు సభ్యులు ఆందోళన వ్యక్తం చేస్తున్నారు. ఇప్పటికే ఎక్సైజ్ అధికారులు, కో ఆపరేటివ్ అధికారుల సహకారంతోనే డిపో యాజమాన్యం సభ్యులను, డైరెక్టర్లను మోసం చేసిందనే ఆరోపణలు బలంగా వినిపిస్తున్నాయి.

’విజయ క్రాంతి దిన పత్రిక మూడవ కల్లు డిపో’ పై రాసిన కథనాల్లో అనేక  కీలక అంశాలు ప్రస్తావించిన విషయం తెలిసినదే. అవేంటంటే.. గతంలో ’విజయ క్రాంతి’ పత్రిక మూడవ డిపోలో జరుగుతున్న అక్రమాలపై అనేక కథనాలను ప్రచురించింది. ఆ కథనాల్లో లేవనెత్తిన అంశాలు ఇప్పటికీ సందర్భోచితంగా నిలిచి ఉన్నాయి

ఆడిట్ రిపోర్టుల గోప్యత..

యాజమాన్యం నిబంధనలకు విరుద్ధంగా ఆడిట్ రిపోర్టులను గోప్యంగా ఉంచి, వాటిని డిపో సభ్యులకు అందుబాటులో ఉంచలేదని గతంలో కథనాలు వెలువడ్డాయి.

నిబంధనల ఉల్లంఘన..

సహకార చట్టం, ఎక్సైజ్ నిబంధనలను ఉల్లంఘిస్తూ పాలకవర్గం తన ఇష్టానుసారం వ్యవహరించడం, దీనికి సంబంధిత అధికారుల మద్దతు ఉండటంపై ’విజయ కాంతి’ ప్రశ్నించింది.

నిధుల మళ్లింపు

నిబంధనలకు విరుద్ధంగా డిపో నిధులను ఇతర అవసరాలకు మళ్లించడం, అడ్డగోలు ఖర్చులను ఆడిట్లో చూపడం వంటి అంశాలు కూడా ఆ కథనాలలో ప్రముఖంగా ప్రస్తావించబడ్డాయి.

కలెక్టర్ పై నే సర్వత్రా దృష్టి

ఇప్పుడు మొత్తం వ్యవహారం జిల్లా కలెక్టర్ వినయ్ కృష్ణారెడ్డి తీసుకునే చర్యలపై ఆధారపడి ఉంది. ఫిర్యాదుదారులతో పాటు సామాన్య ప్రజలు కూడా విచారణ నిష్పక్షపాతంగా జరుగుతుందా లేదా అన్న ఉత్కంఠతో ఎదురుచూస్తున్నారు. నిక్కచ్చిగా విచారణ జరుగుతుందా లేదంటే కలెక్టర్ కళ్ళకు గంతలు కడతారాననే చర్చ జోరుగా జరుగుతోంది

డిమాండ్ ఏంటంటే..

ఒకవేళ విచారణలో అక్రమాలు కప్పిపుచ్చడానికి ప్రయత్నాలు జరిగినా, నిష్పక్ష పాతంగా విచారణ జరగలేదని తేలినా, కలెక్టర్ సంబంధిత విచారణ అధికారిపై, డిపో అక్రమాలకు వత్తాసు పలికిన అధికారులపై కఠిన చర్యలు తీసుకోవాలని డిపో సభ్యులు, కార్మికులు డిమాండ్ చేస్తున్నారు. సమగ్ర విచారణ ద్వారా అక్రమాలకు పాల్పడిన వారందరిపైనా చట్టపరమైన చర్యలు తీసుకోవడమే కాకుండా, భవిష్యత్తులో ఇలాంటి సంఘటనలు జరగకుండా నిరోధించేలా కలెక్టర్ పటిష్టమైన చర్యలు తీసుకోవాలని ప్రజలు కోరుకుంటున్నారు.