హైదరాబాద్: మేడ్చల్ జిల్లా కుషాయిగూడ పోలీస్ స్టేషన్(Kushaiguda Police Station) పరిధిలో శుక్రవారం రాత్రి జరిగిన దారుణ హత్య ఆ ప్రాంతమంతా తీవ్ర దిగ్భ్రాంతికి గురిచేసింది. పోలీసులు తెలిపిన వివరాల ప్రకారం, యాదాద్రి భువనగిరి జిల్లా మోత్కూర్ సమీపంలోని అడ్డగూడూరు గ్రామానికి చెందిన బోడ శంకర్ (40), అతని భార్య మంజుల (35) గత నాలుగు రోజులుగా మహేష్ నగర్ కాలనీలోని తన సోదరి ఇంట్లో వారి ముగ్గురు పిల్లలు ఒక కుమార్తె, ఇద్దరు కుమారులతో కలిసి నివసిస్తున్నారు. శుక్రవారం అర్ధరాత్రి సమయంలో అందరూ నిద్రపోతున్న సమయంలో, శంకర్ మంజులపై కత్తితో దాడి చేసి, ఆమెను నరికి చంపాడు. ఆమె అరుపులు విన్న కుటుంబ సభ్యులు అక్కడికి చేరుకున్నారు. అప్పటికే శంకర్ అక్కడి నుంచి పారిపోయాడు. ఈ దాడిలో మంజుల అక్కడికక్కడే మరణించింది. కుటుంబ సభ్యుల సమాచారంతో ఘటనాస్థలికి చేరుకున్న పోలీసులు కేసు నమోదు చేసుకుని మృతదేహాన్ని పోస్టుమార్టం నిమిత్తం మార్చురీకి తరలించారు. అనంతరం పరారీలో ఉన్న నిందితుడిని పట్టుకోవడానికి గాలింపు చర్యలు చేపట్టారు.