హైదరాబాద్: షబ్-ఎ-మెరాజ్ (Jagne Ki Raat) వేడుకల దృష్ట్యా జనవరి 16వ తేదీ రాత్రి నగరంలోని అన్ని ఫ్లైఓవర్లను మూసివేస్తున్నట్లు హైదరాబాద్ ట్రాఫిక్ పోలీసులు(Hyderabad Traffic Police) ప్రకటించారు. సులభమైన ట్రాఫిక్ నియంత్రణ, ప్రజల భద్రతను నిర్ధారించడానికి, ఈ ఆంక్షలు రాత్రి 10 గంటల తర్వాత అమల్లోకి వస్తాయని పోలీసులు తెలిపారు.  గ్రీన్‌ల్యాండ్స్ ఫ్లైఓవర్, పీవీఎన్ఆర్ ఎక్స్‌ప్రెస్‌వే, లంగర్ హౌస్ ఫ్లైఓవర్‌లు మినహా, నెక్లెస్ రోడ్‌తో సహా హైదరాబాద్‌లోని అన్ని ఫ్లైఓవర్‌లను జనవరి 16, 17 తేదీల మధ్య రాత్రి 10 గంటల తర్వాత పోలీసులు మూసివేయనున్నారు.  

తెలంగాణ తల్లి, షేక్‌పేట్, మన్మోహన్ సింగ్, బహదూర్‌పురా క్రాస్‌రోడ్ ఫ్లైఓవర్‌లను అవసరాన్ని బట్టి మూసివేస్తారు. ప్రయాణికులు తమ ప్రయాణాన్ని ముందుగానే ప్లాన్ చేసుకోవాలని, ప్రత్యామ్నాయ మార్గాలను ఎంచుకోవాలని ట్రాఫిక్ పోలీసులు సూచించారు. అత్యవసర పరిస్థితుల్లో, సహాయం కోసం పౌరులు 9010203626 నంబర్‌లోని ట్రాఫిక్ హెల్ప్‌లైన్‌ను సంప్రదించవచ్చని అధికారులు తెలిపారు. హైదరాబాద్ ట్రాఫిక్ జాయింట్ కమిషనర్ ఆఫ్ పోలీస్ డి జోయెల్ డేవిస్ పౌరులు మళ్లింపులను గమనించి, వారి గమ్యస్థానాలకు చేరుకోవడానికి ప్రత్యామ్నాయ మార్గాలను ఎంచుకుని పోలీసులతో సహకరించాలని కోరారు.