అమీన్‌పూర్‌లో హైడ్రా కూల్చివేతలు!

రెవెన్యూ అధికారుల పర్యవేక్షణలో కూల్చివేతలు

అమీన్‌పూర్, మార్చి 26 (విజయక్రాంతి): అమీన్‌పూర్ సర్వే నంబర్ 993, 823లో వెలసిన అక్రమ నిర్మాణాలను హైడ్రా ఆదేశాలతో రెవెన్యూ అధికారులు కూల్చివేతలు చేపట్టారు. బుధవారం హైడ్రా కమిషనర్ రంగనాథ్ ఆయా సర్వే నంబర్లను పరిశీలించి అధికారులకు ఆదేశాలు జారీ చేశారు. దీంతో గురువారం జేసీబీలతో రంగంలోకి దిగిన అధికారులు కూల్చివేతలు చేపట్టారు.

అక్రమ నిర్మాణాలపై ఎలాంటి ఒత్తిడులకు లొంగకుండా కట్టుదిట్టమైన చర్యలు తీసుకుంటామని స్థానిక తహాశీల్దార్ వెంకటేశ్, ఆర్‌ఐ సంగీతలు తెలిపారు. ఈ సందర్భంగా తహాశీల్దార్ మాట్లాడుతూ.. ప్రభుత్వ భూముల్లో అక్రమాలను ఉపేక్షించేది లేదన్నారు. అక్రమాలకు అడ్డుకట్టవేయడమే లక్ష్యమన్నారు.  అక్రమ నిర్మాణాలపై హైడ్రా, రెవెన్యూ సంయుక్త చర్యలు చేపట్టాయని తెలిపారు.