కేసు నమోదు   

ఎల్బీనగర్, నవంబర్ 30 : అప్పుగా ఇచ్చిన డబ్బులు తిరిగి చెల్లించాలని లెక్చరర్ గా పనిచేసే వ్యక్తిపై దాడిచేసిన ఘటన ఆదివారం ఎల్బీనగర్ పోలీస్ స్టేషన్ పరిధిలో జరిగింది. ఇన్స్ స్పెక్టర్  వినోద్ కుమార్ తెలిపిన వివరాలు.. మేడ్చల్ మండలం గుండ్ల పోచంపల్లికి చెందిన బండారి మధు లెక్చరర్ గా పనిచేస్తున్నాడు. ఆగస్టు 27న ఆర్థిక అవసరాలకు జగనాథం సుంకమ్మ దగ్గర రూ. 2 లక్షలు అప్పుగా తీసుకున్నాడు. ఇటీవల అతను రూ.1,30,000 తిరిగి చెల్లించాడు.

ఒప్పందం ప్రకారం అతను వడ్డీతో సహా మొత్తం రూ. 3,50,000 మొత్తాన్ని తిరిగి చెల్లించాల్సి వచ్చింది. ఆర్థిక ఇబ్బందుల కారణంగా మిగిలిన మొత్తాన్ని సకాలంలో చెల్లించలేదు. ఈ కారణంగా నవంబర్ 29 న ఉదయం 10:30 గంటలకు మధును భువనగిరిలోని సుంకమ్మ ఇంటికి పిలిపించారు. అక్కడకు వెళ్లిన మధును జగన్నాథం సుంకమ్మ, ఆమె బంధువు సోమేశ్ అలియాస్ సోమనాథ్ తదితరులు మన్సూరాబాద్లోని డబుల్ బెడ్రూమ్ కాలనీలో అప్పుపై చర్చిస్తామని చెప్పారు.

మధ్యాహ్నం 2 గంటలకు అతడిని తమ కారులో తీసుకువచ్చి డబుల్ బెడ్రూమ్ ఇంటిలోని ఒక గదిలో బంధించారు. అతడి మొబైల్ ఫోన్ను లాక్కెళ్లి, చీపురు కర్రలతో దాడిచేసి బెదిరించారు. ఆ తర్వాత వారు మధు స్నేహితులకు ఫోన్ చేయమని బలవంతం చేసి రూ. 70 వేలు మొత్తాన్ని బదిలీ చేశారు. వారు అతన్ని ఇంట్లో బంధించి మిగిలిన అప్పు తీర్చమని చెప్పారు.

ఆదివారం మధ్యాహ్నం 1:30 గంటలకు జగనాథం సుంకమ్మ, సోమేష్ నిద్రపోతున్నట్లు మధు గమనించాడు. అత ను వారి మొబైల్ ఫోన్ తీసుకొని పోలీసులకు సమాచారం ఇచ్చాడు. పోలీస్ సిబ్బంది సంఘటనా స్థలానికి చేరుకొని మధును కాపాడినట్లు తెలిపారు.  కేసు నమోదు చేసుకుని దర్యాప్తు చేస్తున్నట్లు సీఐ తెలిపారు.