- ఎన్నికల వేళ పల్లెల్లో జోరుగా మద్యం పంపిణీ

- ఇప్పటికే మొదలైన దావతులు

- మధ్యాహ్నం బిర్యాని, రాత్రి మద్యం 

- నామినేషన్ వేసిన అభ్యర్థుల ఆగచాట్లు

- నేటినుంచి కొత్త మద్యం దుకాణాలు 

సంగారెడ్డి, నవంబర్ 30(విజయక్రాంతి):గామ పంచాయతీ ఎన్నికల వేళ మద్యం కిక్కు ఇవ్వనుంది..కొత్తగా మద్యం దుకాణాలకు స్థానిక ఎన్నికలు కలిసివచ్చాయి. కొత్త దుకాణాలతో బోణీ కొట్టాలని దుకాణం దక్కిన యజమానులు ఉవ్విళ్లూరుతున్నారు. పాత దుకాణదారులకు ఈనెల 30 వరకే అవకాశం ఉండడంతో ఉన్న మందును అమ్మేసుకున్నారు. అయితే డిసెంబర్ 1వ తేదీ నుండి కొత్త దుకాణాలు తెరుచుకోనున్నారు. కొత్త మద్యం దుకాణాలను ఇప్పటికే మద్యం కేటాయించినట్లు తెలుస్తోంది.

ఇలావుండగా గ్రామ పంచాయతీ ఎన్నికలకు ప్రభుత్వం నోటిఫికేషన్ విడుదల చేసి మొదటి విడత నామినేషన్ల ప్రక్రియ పూర్తయి, ఆదివారం నుండి రెండో విడత నామినేషన్ల ప్రక్రియ ప్రారంభమైంది. డిసెంబర్ 17న ఎన్నికలు పూర్తి కానున్నాయి. ఈ నేపథ్యంలో గ్రామాల్లో ఇప్పటికే జోరుగా దావత్ లు, మద్యం పంపకాలు ప్రారంభించారు. ఓటర్లను ఆకట్టుకునేందుకు బీరు, బిర్యాని పంచుతూ నామినేషన్ వేసిన అభ్యర్థులు కాకా పడుతున్నారు. 

సంగారెడ్డి, మెదక్ జిల్లాల్లో 150 వైన్ షాపులు...

సంగారెడ్డి, మెదక్ జిల్లాలో 150 మద్యం దుకాణాలకు గత నెల 27న లక్కీ డ్రా నిర్వహించారు. డిసెంబర్ 1 నుంచి కొత్త వైన్ షాపులు ప్రారంభంకానున్నాయి. పంచాయతీ ఎన్నికలకు సంబంధించి ఇప్పటికే నోటిఫికేషన్ వెలువడింది. కాగా సంగారెడ్డి జిల్లాలో 613 గ్రామ పంచాయతీలకు, మెదక్ జిల్లాలో 492 గ్రామ పంచాయతీలకు మూడు విడతల్లో ఎన్నికలు జరుగను న్నాయి. ఇప్పటికే మొదటి విడత ఎన్నికలు జరిగే పంచాయతీలకు నామినేషన్ల ప్రక్రియ ముగిసింది. రెండో విడత ఆదివారం నుండి ప్రారంభమైంది. డిసెంబర్ 17 వరకు ఎన్నికల ప్రక్రియ కొనసాగనుండగా, మద్యం విచ్చలవిడిగా ప్రవహించే అవకాశం ఉంది. నామినేషన్ ప్రక్రియ నుంచి ఎన్నికల ఫలితాల వరకు నిత్యం మద్యం జోరు కొనసాగనుంది. 

కొత్త దుకాణాలకు లక్కు...

ఉమ్మడి జిల్లాలో కొత్త మద్యం దుకాణాలకు పండగ వాతావరణం నెలకొంది. జిల్లాల్లో మద్యం దుకాణాలు దక్కించుకోవడానికి సిండికేట్ వ్యాపారులు గత నెల 23 వరకు వందల దరఖాస్తులు చేశారు. ఒక్కో దరఖాస్తుకు రూ.3 లక్షల చొప్పున లక్షలాది రూపాయలు వెచ్చించారు. ఎన్నికల వేళ ఒక్కో దుకాణంలో సుమారు రూ.4- రూ.6 కోట్ల వరకు విక్రయాలు జరిగే అవకాశం ఉంది. డిసెంబర్ 1 నుంచి కొత్త షాపులు ప్రారంభం కానున్న నేపథ్యంలో యజమానులు ఇప్పటికే అన్నీ సిద్ధం చేసుకున్నారు.

అయితే పాత యజమానులు మద్యం పెద్ద ఎత్తున బ్లాక్లో అమ్మడానికి సిద్దం చేసినట్లు సమాచారం. కొత్త దుకాణదారులు లాభపడే దానికంటే గ్రామాల్లో బెల్టు దుకాణాలకు మద్యం చేరవేసేందుకు భారీ ఎత్తున ప్రణాళిక సిద్దం చేసుకున్నట్లు విశ్వసనీయ సమాచారం. ఎక్సైజ్ అధికారులు దృష్టి సారిస్తే పెద్ద ఎత్తున అక్రమ మద్యం లభించే అవకాశం ఉంటుంది.