అమరావతి: ఆంధ్రప్రదేశ్‌లోని ప్రకాశం జిల్లాలో(Prakasam district) బుధవారం రెండు వాహనాలు ఢీకొన్న ఘటనలో ఒక వ్యక్తి సజీవ దహనమయ్యాడు. నంద్యాల-అమరావతి జాతీయ రహదారిపై గుర్తు తెలియని వాహనంతో ఢీకొన్న తర్వాత ఒక బొలెరో వాహనం అగ్నిప్రమాదానికి గురైందని పోలీసులు తెలిపారు. ఈ ప్రమాదంలో డ్రైవర్ మంటల్లో చిక్కుకుని సజీవ దహనమయ్యాడు. అదే వాహనంలో ప్రయాణిస్తున్న మరో వ్యక్తి గాయపడ్డాడు. 

ఈ ప్రమాదం రాచెర్ల మండలం రంగారెడ్డిపల్లి గ్రామం సమీపంలో ఉదయం 5.45 గంటల ప్రాంతంలో జరిగింది. పోలీసుల కథనం ప్రకారం, జీడిపప్పు లోడుతో ఉన్న బోలెరో వాహనం తుని నుండి అనంతపురం వైపు వెళ్తోంది. ఈ క్రమంలో అది ఎదురుగా వస్తున్న గుర్తు తెలియని వాహనాన్ని ఢీకొంది. ఈ ఢీకొన్న ఘటనతో బోలెరో వాహనంలో మంటలు చెలరేగాయి. అటుగా వెళ్తున్న ప్రయాణికులు అప్రమత్తం చేయడంతో, అగ్నిమాపక సిబ్బంది ఫైర్ ఇంజన్‌తో సంఘటనా స్థలానికి చేరుకుని మంటలను ఆర్పివేశారు. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు.