1. దేశంలో ఎక్కడా ఉత్సవాలకు ఆ హోదా ఇవ్వలేదు
2. కాజీపేట రైల్వే మ్యానుఫ్యాక్చరింగ్ యూనిట్‌లో స్థానిక యువతకే ఉద్యోగ అవకాశాలు 
3. రాష్ట్రంలో రైల్వేస్టేషన్ల అభివృద్ధికి పెద్దపీట 
4. కేంద్ర బొగ్గు గనుల శాఖ మంత్రి కిషన్‌రెడ్డి 
5. వందేభారత్ రైలులో సికింద్రాబాద్ నుంచి వరంగల్‌కు..

మహబూబాబాద్, నవంబర్ 29 (విజయక్రాంతి): మేడారం జాతరకు జాతీయ హోదా ఇవ్వలేమని, దేశంలో ఎక్కడ కూడా ఉత్సవాలకు కేంద్రం జాతీయ హోదా ఇవ్వలేదని, నిధులు కూడా ఇవ్వడం లేదని, మేడారం విషయంలో కూడా ఇదే విధానాన్ని కొనసాగిస్తా మని కేంద్ర బొగ్గు గనుల శాఖ మంత్రి కిషన్‌రెడ్డి అన్నారు. శనివారం ఆయన వందే భారత్ రైలులో సికింద్రాబాద్ నుంచి వరంగల్‌కు చేరుకున్నారు. వరంగల్ రైల్వే స్టేషన్‌లో సౌకర్యాలను పరిశీలించారు.

అనంతరం కాజీపేట రైల్వే మ్యానుఫ్యాక్చర్ యూనిట్‌ను పరిశీలించారు. పనుల పురోగతిపై సమీక్షించారు. ఈ సందర్భంగా మీడియాతో మంత్రి కిషన్‌రెడ్డి మాట్లాడుతూ.. కాజీపేట రైల్వే మ్యానుఫ్యాక్చరింగ్ యూనిట్‌లో 75 శాతం పనులు పూర్తయ్యాయని వెల్లడించారు. ఇక్కడ స్థానిక యువతకే ఉద్యోగ అవకాశాలు కల్పిస్తామని చెప్పారు. తెలంగాణలో రైల్వే స్టేషన్ల అభివృద్ధికి కేంద్రం అధిక ప్రాధాన్యం ఇస్తోందని తెలిపారు.

రూ.521 కోట్ల వ్యయంతో రైల్ వికాస్ నిగమ్ లిమిటెడ్ (ఆర్విఎన్‌ఎల్) ఈ ప్రాజెక్టును అమలు చేస్తోందన్నారు. మెయిన్ షాప్, టెస్ట్ షాప్, పెయింట్ షాప్, స్టోర్ వార్డ్, అడ్మిన్ బ్లాక్, రెస్ట్ హౌస్, క్యాంటీన్, సెక్యూరిటీ, టాయిలెట్ బ్లాక్స్, బౌండరీ వాల్, ఆర్యుబి, అంతర్గత రైల్వే ట్రాక్, రోడ్లు, ఎలక్ట్రిక్ సబ్స్టేషన్, క్యాంటీన్లను ఆర్‌ఎంయులో నిర్మిస్తున్నామని పేర్కొన్నారు. ఇంకా పైకప్పు సోలార్ ప్లాంట్, సహజ పగటిపూట లైటింగ్, సహజ వెంటిలేషన్, ఎల్‌ఇడి లైటింగ్, మురుగునీటి శుద్ధి కర్మాగారం, వ్యర్థ జలాల రీసైక్లింగ్ ప్లాంట్, వర్షపు నీటి సేకరణ మొదలైన పనులు జరుగుతున్నాయని తెలిపారు.

ఈ ప్రాజెక్టును వచ్చే ఏడాది నాటికి పూర్తి చేయాలని లక్ష్యంగా పెట్టుకున్నామని మంత్రి చెప్పారు. ఆర్‌ఎంయులో 16 కోచ్, మెమూ రేక్లను తయారు చేయాలని ప్రతిపాదించినట్లు తెలిపారు. రాబోయే రైల్వే తయారీ యూనిట్లో అత్యాధునిక సాంకేతిక పరిజ్ఞానం ఉంటుందని ఆయన పేర్కొన్నారు. ఈ ప్రాజెక్టు ఈ ప్రాంతంలోని యువతకు ప్రత్యక్షంగా, పరోక్షంగా ఉపాధిని కల్పిస్తుందని కూడా పేర్కొన్నారు. 

మేడారం జాతరకు జాతీయ హోదా ఇవ్వలేం

మేడారం జాతరకు జాతీయ హోదా ఇవ్వాలంటూ రాష్ట్రం చేస్తున్న విజ్ఞప్తిపై మీడియా ప్రతినిధులు ప్రశ్నించగా.. దేశంలో ఎక్కడ కూడా ఉత్సవాలకు కేంద్రం జాతీయ హోదా ఇవ్వలేదని, నిధులు కూడా ఇవ్వడం లేదని, మేడారం జాతర విషయంలో కూడా ఇదే విధానాన్ని కొనసాగిస్తామని కిషన్‌రెడ్డి చెప్పా రు. టూరిజం, ఆర్కియాలజీ ద్వారా రామప్ప, వెయ్యి స్తంభాల గుడి, జోగులాంబ, భద్రాచలం ఆలయాల అభివృద్ధికి కృషి చేస్తున్నట్లు చెప్పారు.

యునెస్కో గుర్తింపు పొందిన రామ ప్ప అభివృద్ధికి కోసం ఇప్పటికే రూ.65 కోట్లతో పనులు చేపట్టామని, మరో రూ.70 కోట్లతో కృషి చేస్తున్నట్లు చెప్పారు. త్వరలో కొమురవెల్లి రైల్వే స్టేషన్ ప్రారంభించడానికి చర్యలు తీసుకుంటున్నామని చెప్పారు. హనుమకొండ హరిత కాకతీయ హోటల్లో గ్రేటర్ వరంగల్ మున్సిపల్ కార్పొరేషన్, కాకతీయ పట్టణ అభివృద్ధి సంస్థ, ఆర్కియాలజీ, స్మార్ట్ సిటీ తదితర అభివృద్ధి పనులపై అధికారులతో కేంద్ర మంత్రి కిషన్‌రెడ్డి సమీక్షించారు.

వరంగల్ నగరంలోని భద్రకాళి, వేయిస్తం భాల దేవాలయాలను మంత్రి దర్శించేందుకు రాగా అర్చకులు అధికారులు పూర్ణకుంభ స్వాగతం పలికారు. ఆయనవెంట దక్షిణ మధ్య రైల్వే జనరల్ మేనేజర్ సంజయ్ కుమా ర్ శ్రీవాస్తవ, దక్షిణ మధ్య రైల్వే ప్రిన్సిపల్ చీఫ్ మెకానికల్ ఇంజనీర్ బిజయ్ కుమార్ రత్, సికింద్రాబాద్ డివిజన్ డివిజనల్ రైల్వే మేనేజర్ డాక్టర్ ఆర్. గోపాలకృష్ణన్, ఆర్విఎన్‌ఎల్ చీఫ్ ప్రాజెక్ట్ మేనేజర్ పి.వి. సాయిప్రసాద్ ఉన్నారు.