ముంబై: 14 మంది ఉగ్రవాదులు 400 కిలోగ్రాముల ఆర్డీఎక్స్‌తో పేలుళ్లు(RDX Explosions) జరపడానికి నగరంలోకి ప్రవేశించారని బెదిరింపు సందేశం పంపిన నోయిడాకు చెందిన 50 ఏళ్ల వ్యక్తిని ముంబై పోలీసులు అరెస్టు చేసినట్లు శనివారం ఒక అధికారి తెలిపారు. బెదిరింపు సందేశం అందిన 24 గంటల్లోనే ఉత్తరప్రదేశ్‌లోని నోయిడాలోని సెక్టార్ 79లోని అతని నివాసం నుండి నిందితుడు అశ్వినికుమార్ సుప్రాను క్రైమ్ బ్రాంచ్(Crime Branch) అరెస్టు చేసిందని ఆయన తెలిపారు. గురువారం ట్రాఫిక్ పోలీసుల వాట్సాప్ హెల్ప్‌లైన్‌కు ఈ సందేశం అందింది. అందులో 14 మంది ఉగ్రవాదులు మానవ బాంబులు, 400 కిలోల ఆర్‌డిఎక్స్‌తో నగరంలోకి ప్రవేశించారని, నగరాన్ని పేల్చివేయడానికి 34 వాహనాల్లో దానిని అమర్చారని పంపిన వ్యక్తి పేర్కొన్నట్లు అధికారి తెలిపారు.

గణేష్ ఉత్సవాల 10వ రోజు అనంత వినాయక చతుర్దశికి భద్రతా ఏర్పాట్లు చేస్తుండగా బెదిరింపు రావడంతో నగర పోలీసులు తక్షణమే అప్రమత్తం అయ్యారు. వర్లి పోలీస్ స్టేషన్‌లో కేసు నమోదైందని, క్రైమ్ బ్రాంచ్ దర్యాప్తు చేపట్టిందని పోలీసులు అన్నారు. సందేశం పంపినవారి మొబైల్ ఫోన్ నంబర్ గౌతమ్ బుద్ధ నగర్‌లో ఉందని క్రైమ్ బ్రాంచ్ గుర్తించింది. ఆ తర్వాత పోలీసు బృందం నోయిడాకు వెళ్లి నిందితుడిని పట్టుకున్నట్లు అధికారి తెలిపారు. అరెస్టు చేసిన నిందితుడిని ముంబైకి తీసుకువస్తున్నామని, శనివారం మధ్యాహ్నం కోర్టు ముందు హాజరుపరుస్తామని చెప్పారు. ఈ నకిలీ బెదిరింపు(Fake threat) వెనుక గల ఉద్దేశ్యం ఇంకా నిర్ధారించబడలేదని పోలీసులు పేర్కొన్నారు.