న్యూఢిల్లీ: అమెరికా అధ్యక్షుడు డొనాల్డ్ ట్రంప్(US President Donald Trump) ప్రకటించిన 20 అంశాల గాజా శాంతి ప్రతిపాదనను ప్రధానమంత్రి నరేంద్ర మోదీ(PM Narendra Modi ) స్వాగతించారు. ఇజ్రాయెల్, హమాస్ యుద్ధం ముగిసేందుకు దోహదం చేస్తోందని మోదీ పేర్కొన్నారు. గాజా కోసం శాంతి ప్రతిపాదన ఇజ్రాయెల్-హమాస్ మధ్య యుద్ధాన్ని ముగించడం లక్ష్యంగా పెట్టుకుంది. కాల్పుల విరమణ జరిగిన 72 గంటల్లోపు జీవించి ఉన్న, చనిపోయిన బందీలందరినీ తిరిగి తీసుకురావాలని కోరుతుంది. మంగళవారం ఎక్స్ పోస్ట్‌లో మోడీ "గాజా వివాదాన్ని అంతం చేయడానికి అధ్యక్షుడు డొనాల్డ్ ట్రంప్ చేసిన సమగ్ర ప్రణాళికను మేము స్వాగతిస్తున్నాము. ఇది పాలస్తీనా-ఇజ్రాయెల్ ప్రజలకు, అలాగే విస్తృత పశ్చిమాసియా ప్రాంతానికి దీర్ఘకాలిక, స్థిరమైన శాంతి, భద్రత అభివృద్ధికి ఆచరణీయమైన మార్గాన్ని అందిస్తుంది. అధ్యక్షుడు ట్రంప్ చొరవకు సంబంధిత వారందరూ కలిసి వస్తారని, సంఘర్షణను అంతం చేయడానికి, శాంతిని భద్రపరచడానికి ఈ ప్రయత్నానికి మద్దతు ఇస్తారని మేము ఆశిస్తున్నాము." అని ప్రధాని మోదీ పేర్కొన్నారు. 

ఇజ్రాయెల్-హమాస్ యుద్ధాన్ని ముగించాలనే ట్రంప్ ప్రణాళికను పాలస్తీనా ప్రభుత్వం స్వాగతించింది. అమెరికా డిమాండ్ చేసిన సంస్కరణలను చేస్తామని వారు ప్రతిజ్ఞ చేశారు. గాజాలో యుద్ధాన్ని ముగించాలని అమెరికా అధ్యక్షుడు ట్రంప్ చేసిన ప్రకటనను సౌదీ అరేబియా, జోర్డాన్, యునైటెడ్ అరబ్ ఎమిరేట్స్, ఖతార్, ఈజిప్ట్ విదేశాంగ మంత్రులు స్వాగతిస్తున్నట్లు సంయుక్త ప్రకటనలో తెలిపారు. ఒప్పందాన్ని ఖరారు చేయడానికి, దాని అమలును నిర్ధారించడానికి అమెరికా, సంబంధిత పార్టీలతో సానుకూలంగా సహకరించడానికి సిద్ధంగా ఉన్నామని మంత్రులు, ఇతర అరబ్, ఇస్లామిక్ విదేశాంగ మంత్రులతో కలిసి తెలిపారు. ఫ్రాన్స్ అధ్యక్షుడు ఇమ్మాన్యుయేల్ మాక్రాన్ సోమవారం నాడు గాజాలో యుద్ధాన్ని ముగించడానికి, బందీలందరినీ విడుదల చేయడానికి ట్రంప్ నిబద్ధతను స్వాగతిస్తున్నట్లు పేర్కొన్నారు.