నాడు కౌన్సిలర్.. నేడు ఆర్టీఐ కార్యకర్త!

సమాచార హక్కు చట్టంతో అధికారులపై ఒత్తిళ్లు?

‘డబ్బులిస్తే సరి.. లేదంటే బండారం బయటపెడతా’ అంటూ బెదిరింపుల ఆరోపణలు

నలుగురి టీమ్.. ఒక్కో శాఖపై ఒక్కో రకమైన ఒత్తిడి?

వరుస ఆర్టీఐలు, ఫిర్యాదులతో అధికారుల్లో గుబులు 

నారాయణపేట. ఆగస్టు 12 (విజయక్రాంతి): నాడు ప్రజాప్రతినిధి.. నేడు అధికార పార్టీ నాయకుడు.. ఇప్పుడు సమాచార హక్కు చట్టం (ఆర్టీఐ) కార్యకలాపాల చుట్టూ వివాదం. ప్రభుత్వ కార్యాలయాల్లో వరుసగా సమాచార దరఖాస్తులు చేస్తూ అధికారులపై ఒత్తిడి తెస్తున్నారనే ఆరోపణలు నారాయణపేటలో చర్చనీయాంశంగా మారాయి. తమకు అనుకూలంగా వ్యవహరించని అధికారులను ఆర్టీఐ దరఖాస్తులు, ఫిర్యాదులతో ఇబ్బందులకు గురిచేస్తున్నారనే విమర్శలు వినిపిస్తున్నాయి.

డబ్బులిస్తే సరి.. లేదంటే..

గతంలో అధికార పార్టీకి చెందిన కీలక నాయకుడికి సన్నిహితంగా ఉన్న వ్యక్తిగా పేరున్న సదరు మాజీ ప్రజాప్రతినిధి.. ప్రస్తుతం తన రాజకీయ పరిచయాలను ఉపయోగించుకుని అధికారులపై ప్రభావం చూపుతున్నారనే ఆరోపణలు ఉన్నాయి. ‘డబ్బులిస్తే సరి.. లేదంటే నీ బండారం బయటకు లాగుతా’ అంటూ అధికారులను హెచ్చరిస్తున్నారనే ప్రచారం జరుగుతోంది. తమకు అనుకూలంగా వ్యవహరించకపోతే ఫిర్యాదులు చేయడం.. ఆర్టీఐ ద్వారా సమాచారాన్ని కోరడం.. సేకరించిన సమాచారంతో ఆరోపణలు చేయడం వంటి చర్యలకు పాల్పడుతున్నారనే విమర్శలు వినిపిస్తున్నాయి. అయితే ఈ ఆరోపణలకు సంబంధించి అధికారికంగా ఎలాంటి నిర్ధారణ లేదు. సంబంధిత వ్యక్తుల వివరణ కూడా వెలువడాల్సి ఉంది.

ఆర్‌టీఐ.. అస్త్రంగా?

ప్రభుత్వ కార్యకలాపాల్లో పారదర్శకత కోసం తీసుకొచ్చిన సమాచార హక్కు చట్టం ప్రజలకు ఎంతో ఉపయోగకరం. ప్రభుత్వ నిధుల వినియోగం, అభివృద్ధి పనులు, పథకాల అమలు, లబ్ధిదారుల ఎంపిక వంటి అంశాలపై సమాచారం తెలుసుకునే హక్కును ఇది కల్పిస్తుంది. అయితే కొందరు ఈ చట్టాన్ని వ్యక్తిగత ప్రయోజనాల కోసం ఉపయోగిస్తున్నారనే ఆరోపణలు అప్పుడప్పుడు వినిపిస్తుంటాయి. నారాయణపేటలోనూ ఇదే తరహా విమర్శలు తెరపైకి వచ్చాయి. ఒకే శాఖకు సంబంధించి వరుసగా దరఖాస్తులు చేయడం.. ఒక అంశంపై సమాచారం తీసుకున్న తర్వాత మరో అంశాన్ని తెరపైకి తేవడం.. అనంతరం ఫిర్యాదులు చేయడం వంటి పరిణామాలు అధికారులకు తలనొప్పిగా మారుతున్నాయనే చర్చ జరుగుతోంది.

ఆ నలుగురు టీమ్?

ఈ వ్యవహారంలో నలుగురు వ్యక్తులు సమన్వయంతో పనిచేస్తున్నారనే ఆరోపణలు ఉన్నాయి. ఒకరు ఆర్టీఐ దరఖాస్తులు చేయడం.. మరొకరు అధికారులపై ఫిర్యాదులు చేయడం.. మాజీ ప్రజాప్రతినిధి తన రాజకీయ పరిచయాలతో ఒత్తిడి తేవడం.. మరో వ్యక్తి సేకరించిన సమాచారాన్ని ప్రచారంలోకి తీసుకురావడం వంటి విధానంలో వ్యవహరిస్తున్నారనే విమర్శలు వినిపిస్తున్నాయి. దీంతో ఒక్కో శాఖలోని అధికారులను లక్ష్యంగా చేసుకుని వ్యవహరిస్తున్నారనే ఆరోపణలు వస్తున్నాయి. అయితే ఈ నలుగురి మధ్య నిజంగా సమన్వయం ఉందా? అన్నది స్పష్టత రావాల్సి ఉంది.

అధికారుల్లో గుబులు

నిబంధనల ప్రకారం పని చేసినా.. ఏదో ఒక అంశాన్ని పట్టుకుని ఫిర్యాదు చేస్తారేమో అనే భయం కొందరు అధికారుల్లో ఉన్నట్లు సమాచారం. ఆర్టీఐ దరఖాస్తులకు నిబంధనల మేరకు సమాధానం ఇవ్వాల్సి ఉన్నప్పటికీ.. ఆ తర్వాత వ్యక్తిగత ఆరోపణలు, ఫిర్యాదులు వస్తాయనే ఆందోళన వ్యక్తమవుతున్నట్లు తెలుస్తోంది. ప్రభుత్వ ఉద్యోగులు స్వేచ్ఛగా నిర్ణయాలు తీసుకోవాల్సిన పరిస్థితుల్లో ఇలాంటి ఒత్తిళ్లు ఉంటే పాలనపై ప్రభావం పడే అవకాశం ఉందని అధికారులు పేర్కొంటున్నట్లు సమాచారం.

వార్తలతో మరింత ఒత్తిడి?

ఆర్టీఐ ద్వారా సేకరించిన పత్రాలు, నివేదికలను వెంట పెట్టుకుని కొందరు వ్యక్తులు పత్రికలు, సామాజిక మాధ్యమాలను ఆశ్రయిస్తున్నారనే విమర్శలు ఉన్నాయి. అధికారులపై ఆరోపణలతో వార్తలు రాయించడం ద్వారా ఒత్తిడి పెంచుతున్నారనే ఆరోపణలు కూడా వినిపిస్తున్నాయి. అయితే ప్రజా ప్రయోజనానికి సంబంధించిన అవకతవకలను వెలుగులోకి తీసుకురావడం, అధికారులను ప్రశ్నించడం ప్రజాస్వామ్యంలో సహజమైన ప్రక్రియ. కేవలం ఆరోపణల ఆధారంగా ఎవరినీ తప్పుబట్టలేం. ఆధారాలతో కూడిన విచారణ ద్వారానే వాస్తవాలు నిర్ధారణ కావాల్సి ఉంది.

ఆర్‌టీఐ కార్యకర్తల పాత్ర కీలకం

ప్రభుత్వ వ్యవస్థలో పారదర్శకత కోసం ఆర్టీఐ కార్యకర్తలు చేసే కృషి ప్రశంసనీయం. ప్రభుత్వ నిధుల దుర్వినియోగం, అక్రమాలు, అవకతవకలను వెలుగులోకి తీసుకురావడంలో ఆర్టీఐ కీలక ఆయుధం. అయితే అదే చట్టాన్ని బెదిరింపులకు, కక్ష సాధింపులకు లేదా వ్యక్తిగత ప్రయోజనాలకు వినియోగిస్తున్నారనే ఆరోపణలు నిజమైతే సంబంధిత అధికారులు ఆధారాలు సేకరించి చట్టపరమైన చర్యలు తీసుకోవాల్సిన అవసరం ఉంది.

ఉన్నతాధికారులు దృష్టి సారించాల్సిందే

నారాయణపేట జిల్లాలో ఇటీవల దాఖలైన ఆర్టీఐ దరఖాస్తులు, ఫిర్యాదులను పరిశీలిస్తే ఈ వ్యవహారంపై స్పష్టత వచ్చే అవకాశం ఉంది. ఏ శాఖలో ఎన్ని దరఖాస్తులు చేశారు? ఏ అంశాలపై సమాచారం కోరారు? వాటి ఆధారంగా ఎలాంటి ఫిర్యాదులు చేశారు? ఎవరిపై చేశారు? ఫిర్యాదుల తర్వాత ఎలాంటి పరిణామాలు చోటుచేసుకున్నాయి? అనే అంశాలపై పరిశీలన అవసరమని పలువురు అభిప్రాయపడుతున్నారు.

ఆరోపణలు నిజమా.. రాజకీయ కక్షలా?

అధికారులపై ఒత్తిళ్లు తెస్తున్నారనే ఆరోపణలు నిజమా? లేక రాజకీయ కక్షలు, వ్యక్తిగత విభేదాల నేపథ్యంలో జరుగుతున్న ప్రచారమా? అనేది తేలాల్సి ఉంది. సంబంధిత మాజీ ప్రజాప్రతినిధి, ఆర్టీఐ కార్యకర్తలు, ఆరోపణలు ఎదుర్కొంటున్న ఇతర వ్యక్తుల వివరణ వెలువడాల్సి ఉంది. వారి వాదనలను పరిగణనలోకి తీసుకుని సమగ్ర విచారణ జరిగితేనే అసలు విషయం బయటపడే అవకాశం ఉంది.