4 నెలల్లో 24 టన్నుల బంగారం కొన్న ఆర్బీఐ

ముంబై, ఏప్రిల్ మే 22: కేవలం నాలుగు నెలల వ్యవధిలో రిజర్వ్‌బ్యాంక్ 24 టన్నుల బంగారాన్ని కొన్నది. భౌగోళిక రాజకీయ ఉద్రిక్తతల నడుమ మార్కెట్ల ఒడిదుడుకుల నుంచి ఫారెక్స్ నిల్వల్ని సంరక్షించుకునేందుకు ఈ ఏడాది జనవరి నుంచి ఏప్రిల్ వరకూ ఇంత పెద్ద మొత్తంలో బంగారం నిల్వల్ని ఆర్బీఐ జతచేసుకున్నది. 2023 మొత్తం సంవత్సరంలో కొనుగోలు చేసిన 16 టన్నులకంటే ఈ ఏడాది తొలి నాలుగు నెలల్లో 150 శాతం ఎక్కువ కొన్నది. 2023 డిసెంబర్ చివరినాటికి రిజర్వ్‌బ్యాంక్ వద్దనున్న విదేశీ మారక నిల్వల్లో బంగారం నిల్వలు 805 టన్నులు ఉండగా, 2024 ఏప్రిల్ 26నాటికి ఇవి 827.69 టన్నులకు చేరాయి. దీంతో విదేశీ మారక నిల్వల్లో బంగారం వాటా 7.75 శాతం నుంచి 8.7 శాతానికి చేరింది.