1. సర్పంచ్ పదవికి ’హస్తం’లో ఫుల్ గిరాకీ
2. పల్లెలో బుజ్జగింపులు, బేరసారాలు 

రంగారెడ్డి, నవంబర్ 30(విజయక్రాంతి): పల్లెపోరు రసవ త్తరంగా మారింది. స్థానిక పోరు పార్టీ గుర్తులతో జరిగేవి.... కాకున్నా.. గ్రామాల్లో పట్టు సాధించాలనే లక్ష్యంతో ప్రధాన పార్టీలు దృష్టి సారించాయి. తమ ప్రత్యర్థి పార్టి లకు దీటుగా ఎత్తుగడలతో ముందుకు సాగుతున్నాయి. జిల్లా లో పలు గ్రామ పంచాయతీల్లో రెబల్స్ బెడద అధికార పార్టీ కాంగ్రెస్ ను వేధిస్తోంది. తొలి విడత ఎన్నికలకు సంబంధించి నామినేషన్ల ఘట్టం ముగియగా రెండో విడుత నామినేషన్ల ప్రక్రియ ప్రారంభమైంది.

అధికార పార్టీ లో కొన్ని స్థానాలలో సర్పంచ్ పదవికి ఇద్దరు నుంచి ముగ్గురికి పైగా పార్టీ కార్యక్రకర్తలు  నామినేషన్లు దాఖలు చేశారు.  మొదటి విడుత నామినేషన్ల గడువు ముగియగా రెబెల్స్ ను బుజ్జగించే పనిలో ఆయా పార్టీల నేతలు దృష్టి సారించారు. ముఖ్యంగా షాద్నగర్, చేవెళ్ల, పారిశ్రామిక ప్రాంతాల్లో  రెబెల్స్ బెడద ఎక్కువగా  ఉంది. ఈ నేపథ్యంలో కాంగ్రెస్ ముఖ్యనేతల్లో  గుబులు నెలకొన్నట్లు తెలుస్తోంది.

పార్టీ కోసం కష్టపడ్డ కార్యకర్తలు కు ప్రయారిటీ... క్షేత్రస్థాయిలో కాంగ్రెస్  పార్టీని అధికారంలోకి తెచ్చేందుకు కృషిచేసిన వారికే ప్రధానంగా సర్పంచ్ అభ్యర్థులకు పార్టీ మద్దతు పలుకుతుంది. అక్కడ పరిస్థితులు, పార్టీ బలబలాలు, ప్రజల్లో ఉండే వ్యక్తిగత అభిప్రాయాలు, గ్రామాన్ని అభివృద్ధి పథంలో విజన్ కలిగిన కార్యకర్తలకు సర్పంచ్ గా పోటీ చేసేందుకు పార్టీ పచ్చ జెండా ఊపింది. గత పదేళ్లు గా అధికారం కోసం కళ్ళు కాసేలా కాంగ్రెస్ పార్టీ ఎదురుచూసింది.

అధికారంలోకి రాగా.. పరిస్థితుల ప్రభావంతో చాలా ఏళ్లుగా గ్రామస్థాయిలో పదవులకు దూరంగా ఉండి రిజర్వేషన్లు అనుకూలం గా వచ్చిన వారు ఇదే సరైన సమయమని భావిస్తు న్నారు. ఇటీవల జూబ్లీహిల్స్ ఉపఎన్నికలో కాంగ్రెస్ అభ్యర్థి గెలుపొందడంతో పార్టీ శ్రేణుల్లో ఉత్సాహం తొణికిసలాడుతోంది.

ఈ నేపథ్యంలో సర్పంచ్ బరిలో నిలిచేందుకు వెనుకాడేది లేదని సంకేతాలిస్తూనే.. నామినేషన్లు దాఖలు చేస్తున్నారు. అత్యధికార పార్టీలో సర్పంచ్ బరిలో  మెజార్టీ కార్యకర్తలు పోటీ పడడంతో  వారిని ఎలా బుజ్జగించాలో నేతల తలలు పట్టుకుంటున్నారు.

బుజ్జగింపులు.. బెరసారాలు.. 

స్థానిక సంస్థల ఎన్నికలను దృష్టిలో పెట్టుకొని పార్టీ అధిష్టానం ఆదేశాల మేరకు జిల్లా, నియోజకవర్గస్థాయిలో ఎమ్మెల్యే, ఇన్చార్జి మంత్రులు, పార్టీ కార్యకర్తలతో ప్రత్యేక సమావేశం నిర్వహించారు. ప్రధానంగా స్థానిక సంస్థల ఎన్నికల్లో  మెజార్టీ స్థానాలను తెలుసుకోవాలని  పార్టీ నేతలకు దిశా నిర్దేశం చేశారు. స్థానిక సంస్థల ఎన్నికల నగరా మోగడంతో  ఆయా నియోజకవర్గాల్లోని కాంగ్రెస్ ఎమ్మెల్యేలు, ముఖ్యనేతలు గ్రామ పంచాయతీల వారీగా కసరత్తు చేశారు.

ఈ క్రమంలో పలు జీపీల్లో సర్పంచ్ పదవుల ఏకగ్రీవంపై దృష్టి పెట్టి.. అందుకనుగుణంగా కార్యాచరణ చేపట్టినట్లు సమాచారం. దీంతోపాటు ఆశావహుల చరిష్మా, గ్రామానికి, పార్టీకి చేసిన సేవలతో పాటు ఆర్థిక అంశాలను పరిగణనలోకి తీసుకుని గెలుపొందే అభ్య ర్థుల చిట్టా తయారు చేసినట్లు వినికిడి. ప్రత్యేకంగా గ్రామాల్లో సర్వే చేపట్టి, పార్టీ గెలుపు బలాబలాల పైన  రిపోర్టులు తెప్పించుకుంటున్నారు.

అయితే పలు జీపీల్లో అనుకున్నదాని కం టే పార్టీ ఆశావహులు పోటీపడుతుం డడం నేతలకు తలనొప్పిగా మారింది. ఏదేమైనా రెబల్స్ నామినేషన్లను ఉపసం హరించుకునేలా... ఆయా గ్రామాల్లో రాజుకుంటున్న కొత్త, పాత పంచాయితీతో  పార్టీ కి నష్టం వాటిల్లకుండా తగిన చర్యలకు ఉపక్రమించినట్లు తెలుస్తోంది.

ఆశావహులు ఎక్కువ ఉన్న పలు గ్రామాల్లో స్థానిక నాయకుల ఆధ్వర్యంలో ఇప్పటికే బుజ్జగింపులతో పాటు బేరసారాలు నడుస్తున్నట్లు కాం గ్రెస్ వర్గాల్లో చర్చ జరుగుతోంది. బెరసారాల్లో ఏరియా ప్రాంతం బట్టి రెబల్స్ కు భారీగా నగదును ముట్టజేస్తున్నట్లు గుడంగా ప్రచారం సాగుతుంది. మొత్తం మీద పల్లె పోరు మాత్రం అధికార, ప్రతిపక్ష పార్టీల్లో సై అంటే సై అంటున్నాయి.

రెండో విడత నామినేషన్లు ప్రారంభం..

చేవెళ్ల, కందుకూరు డివిజన్ల లో రెండో విడత నామినేషన్ల ఘట్టం ప్రారంభమైంది. ఆయా డివిజన్ లో ని ఏడు మండలాల పరి ధిలోని 178 పంచాయతీలు, 1,540 వార్డులకు ఆది వారం నుంచి నామినేషన్ల పర్వం మొదలైంది చేశారు. 

రెండో విడత వివరాలు.. 

మండలం     జీపీలు వార్డులు

శంకర్పల్లి          24          210

మొయినాబాద్        19          166

చేవెళ                  25           218

షాబాద్                  41           325

ఆమనగల్లు          13           112

కడ్తాల్                  24            210

తలకొండపల్లి   32            272