24 గంటల్లో నిందితులను పట్టుకున్న పోలీసులు

జగిత్యాల అర్బన్, నవంబర్ 30 (విజయ క్రాంతి): జగిత్యాల పట్టణం నిజామాబాద్ జాతీయ రహదారిపై శనివారం అర్ధరాత్రి ఓ డీసీఎం డ్రైవర్ ను కర్రలతో కొట్టి అతని వద్ద నుండి రు.22 వేల నగదు, సెల్ ఫోను ఎత్తుకెళ్లిన దొంగల ముఠా ను అరెస్టు చేసి రిమాండ్ కు పంపినట్లు జగిత్యాల డిఎస్పి రఘు చందర్ తెలిపారు. ఆదివారం డిఎస్పీ కార్యాలయంలో ఏర్పాటు చేసిన విలేకరుల సమావేశంలో వివరాలు వెల్లడించారు.

ఈ సందర్భంగా డిఎస్పి రఘుచందర్ మాట్లాడుతూ మంచిర్యాల జిల్లాఆన్నెల మండలం, జెండా వెంకటాపూర్ కు చెందిన తాళ్లపల్లి నవీన్ అనే వ్యక్తి తన సొంత డి సి ఎం వాహనంలో వడ్ల లోడ్ ను నిజామాబాదు కు తీసుకెళ్లాడని తెలిపారు. అక్కడ వడ్ల లోడ్ ను దింపి స్వగ్రామం మంచిర్యాలకు తిరిగి వస్తున్న క్రమంలో జగిత్యాల- నిజామాబాద్ జాతీయ రహదారి రిలయన్స్ పెట్రోల్ వద్ద అర్ధరాత్రి 1.30 ప్రాంతంలో కాలకృత్యాల కోసం వాహనాన్ని నిలిపాడని తెలిపారు.

ఇదే సమయంలో మోటార్ బైక్ పై వచ్చిన జగిత్యాల పట్టణం పెరకపల్లి రోడ్డు కు చెందిన ఎర్రం సాయి, గాంధీనగర్ కు చెందిన నక్క గణేష్ తో పాటు మరో మైనర్ నిందితుడు వాహన డ్రైవర్ నవీన్ పై కర్రలతో దాడి చేసి గాయపరచి అతని వద్ద ఉన్న రూ.22 వేలు నగదు, మొబైల్ ఫోను దొంగిలించి పారిపోయారని వివరించారు. నవీన్ ఫిర్యాదు మేరకు జగిత్యాల పట్టణ పోలీసులు కేసు నమోదు చేసి నిందితులకోసం గాలింపు చర్యలు చేపట్టారన్నారు.

ఈ క్రమంలో ఆదివారం మధ్యాహ్నం పెరికపల్లి రోడ్డు వద్ద నిందితులను పట్టుకొని దొంగిలించిన సొత్తును స్వాధీనం చేసుకున్నట్లు డిఎస్పీ తెలిపారు. దొంగతనం జరిగిన 24 గంటల్లోనే నిందితులను అరెస్టు చేసిన జగిత్యాల సిఐ కరుణాకర్, స్పెషల్ పార్టీ పోలీసులను డిఎస్పి అభినందించారు.