అమేథీ: ఉత్తరప్రదేశ్‌లోని అమేథీ జిల్లాలో(Amethi) మంగళవారం ఉదయం దట్టమైన పొగమంచు(Fog) కారణంగా ఆరు వాహనాలు ఒకదానికొకటి ఢీకొన్న ఘటనలో ఇద్దరు మరణించగా, మరో 16 మంది గాయపడ్డారని పోలీసులు తెలిపారు. క్షతగాత్రులను చికిత్స నిమిత్తం సమీప ఆస్పత్రికి తరలించారు. ఈ ఘటన ముసాఫిర్‌ఖానా పోలీస్ స్టేషన్ పరిధిలోని ఒక అండర్‌బ్రిడ్జి సమీపంలో జరిగింది. 

స్టేషన్ హౌస్ ఆఫీసర్ వివేక్ సింగ్ మాట్లాడుతూ, పొగమంచు కారణంగా సరిగా కనిపించకపోవడంతో ఒక ట్రక్కు రోడ్డు పక్కన ఉన్న రెయిలింగ్‌ను ఢీకొనడంతో అమేథీ-సుల్తాన్‌పూర్ మలుపు వద్ద ఈ ప్రమాదం జరిగిందని తెలిపారు. ఆ తర్వాత వెనుక నుండి వస్తున్న మరో మూడు ట్రక్కులు, ఒక కారు, ఒక బస్సు ఒకదానికొకటి ఢీకొన్నాయని, దీనివల్ల అనేక వాహనాలు ఒకదానిపై ఒకటి పడిపోయాయని స్టేషన్ హౌస్ ఆఫీసర్ వెల్లడించారు. ఈ ఘటనపై కేసు నమోదు చేసుకుని మృతదేహాలను పోస్టుమార్టం నిమిత్తం మార్చురీకి తరలించారు.