సీఐటీయూ జిల్లా ఉపాధ్యక్షుడు పిట్టల అర్జున్ డిమాండ్

దమ్మపేట, మార్చి 30 (విజయక్రాంతి): ఆశా వర్కర్లు తమ న్యాయమైన సమస్యలు పరిష్కరించాలని, ప్రభుత్వం ఎన్నికల హామీగా ఇచ్చిన  వాగ్దానం 18 వేల రూపాయల వేతనం  అమలు చేయాలని అడిగితే రాష్ట్ర ప్రభుత్వానికి నేరంగా అగుపిస్తుందని సిఐటియు జిల్లా ఉపాధ్యక్షుడు పిట్టల అర్జున్ అన్నారు. రాష్ట్ర రాజధానిలో ఆశ వర్కర్ల సమస్యలపై ధర్నా నిర్వహిస్తున్న సిఐటియు రాష్ట్ర ప్రధాన కార్యదర్శి పాలడుగుల భాస్కర్,  ఇతర నాయకుల అక్రమ అరెస్టులను నిరసిస్తూ సోమవారం తహసిల్దార్ కార్యాలయం ఎదుట ధర్నా నిర్వహించారు.

ఈ సందర్భంగా సునీత అధ్యక్షతన జరిగిన సభలో అర్జున్ మాట్లాడుతూ ఆశా వర్కర్లు ప్రజలకు అనేక రకాల వైద్య సేవలు అందిస్తున్నారని కానీ వారికి ప్రతినెలా సక్రమంగా పారితోషకాలు అందటంలేదని అన్నారు. గత ప్రభుత్వం తమ సమస్యలు పరిష్కరించలేదని, కాంగ్రెస్ ప్రభుత్వం ఏర్పడితే కనీస వేతనాలు ఉద్యోగ భద్రత కల్పిస్తారని ఆశించిన ఆశలకు నిరాశే ఎదురైందని అన్నారు. అనంతరం సిఐటియు మండల కన్వీనర్ మురహరిరఘు మాట్లాడుతూ సమస్యల పరిష్కారానికి ఐక్యతతో  పోరాడటమే మార్గమని అన్నారు. ఈ కార్యక్రమంలో ఆశ వర్కర్స్ యూనియన్ నాయకులు శారద, రాధ, శ్రీలత, సంధ్య, రజిని, రమణ, నాగమణి, భాగ్యమ్మ తదితరులు పాల్గొన్నారు.