ఛత్తీస్‌గఢ్‌: ఛత్తీస్‌గఢ్‌లోని సుక్మా జిల్లాలో ఆదివారం భద్రతా దళాలకు మావోయిస్టులకు మధ్య ఎదురుకాల్పులు జరిగాయి. ఈ కాల్పుల్లో ముగ్గురు మావోయిస్టులు మృతి చెందారు. సుక్మా జిల్లాలోని అటవీ, కొండ ప్రాంతాలలో మావోయిస్టుల ఉనికి గురించి విశ్వసనీయ సమాచారం అందడంతో భద్రతా అధికారులు తెల్లవారుజామున ఆపరేషన్ ప్రారంభించారు. ఆపరేషన్ సమయంలో అడపాదడపా కాల్పులు జరిగాయని,  ఇప్పటివరకు మూడు మావోయిస్టు కేడర్లను చంపినట్లు సుక్మా పోలీసు సూపరింటెండెంట్ కిరణ్ చవాన్ తెలిపారు.

ఈ ఎన్ కౌంటర్ లో కీలకమైన మిలీషియా కమాండర్‌తో సహా రూ.15 లక్షల సమిష్టి బహుమతిని ప్రకటించిన ముగ్గురు నక్సల్స్ మరణించారని, ఎన్‌కౌంటర్ స్థలం నుండి 303 రైఫిల్, బిజిఎల్ లాంచర్లు సహా ఆయుధాలు, మందుగుండు సామగ్రిని స్వాధీనం చేసుకున్నట్లు పోలీసులు వెల్లడించారు. హతమైన నక్సల్స్‌లో జనమిలిషియా కమాండర్, స్నిపర్ స్పెషలిస్ట్, కొంటా ఏరియా కమిటీ సభ్యుడు మాద్వి దేవా, కొంటా ఏరియా కమిటీ సీఎన్ఎ కమాండర్ పోడియం గంగి, కిష్టారాం ఏరియా కమిటీ సభ్యుడు సోడి గంగి ఉన్నారు. వారిలో ఇద్దరు మహిళలు, ముగ్గురిలో ఒక్కొక్కరి తలపై రూ.5 లక్షల రివార్డు ఉంది.