హైదరాబాద్: నాంపల్లిలోని ఎగ్జిబిషన్ గ్రౌండ్స్‌లో జరగనున్న 85వ నుమాయిష్ దృష్ట్యా జనవరి 1 నుండి ఫిబ్రవరి 15 వరకు ప్రతిరోజూ సాయంత్రం 4 గంటల నుండి అర్ధరాత్రి వరకు పరిసర ప్రాంతాల్లో ట్రాఫిక్ ఆంక్షలు విధించారు. దాని ప్రకారం, ఎస్ఏ బజార్ -జంబాగ్ వైపు నుండి నాంపల్లి వైపు వచ్చే ఆర్టీసీ బస్సులు, ప్రైవేట్ బస్సులు, భారీ వాహనాలను ఆబిడ్స్ రోడ్డు జంక్షన్ వైపు మళ్లిస్తారు. అలాగే, పోలీస్ కంట్రోల్ రూమ్, బషీర్‌బాగ్ నుండి నాంపల్లి వైపు వచ్చే బస్సులు, ఇతర భారీ వాహనాలను కూడా ఆబిడ్స్ రోడ్డు వైపు మళ్లిస్తారు.

అదేవిధంగా, బేగం బజార్ నుండి మలక్‌కుంట వైపు వెళ్లే భారీ, మధ్య తరహా మోటారు వాహనాలను దారుసలాం, ఏక్ మినార్, నాంపల్లి వైపు మళ్లిస్తారు. అలాగే దారుసలాం (గోషామహల్ రోడ్డు) నుండి అఫ్జల్‌గంజ్ లేదా ఆబిడ్స్ రోడ్డు వైపు వెళ్లే వాహనాలను బేగం బజార్, సిటీ కాలేజ్, నయాపూల్ వైపు మళ్లిస్తారు. అదేవిధంగా, మూసా బౌలి -బహదూర్‌పురా నుండి నాంపల్లి వైపు వెళ్లే ఆర్టీసీ బస్సులతో సహా ఇతర వాహనాలను నయాపూల్ -ఎంజే మార్కెట్ వైపు మళ్లిస్తారు. 

ముఖ్యంగా ప్రతిరోజూ సాయంత్రం 4 గంటల నుండి అర్ధరాత్రి 12 గంటల వరకు ఎంజె మార్కెట్ - గాంధీ భవన్ - నాంపల్లి జంక్షన్ మార్గాన్ని నివారించాలని, ప్రదర్శన ముగిసే వరకు ప్రత్యామ్నాయ మార్గాలను ఎంచుకోవాలని హైదరాబాద్ ట్రాఫిక్ పోలీసులు ప్రయాణికులను అభ్యర్థించారు. ఈ ప్రదర్శనను సందర్శించాలనుకునే పౌరులు ఆర్టీసీ బస్సులు, మెట్రో రైలు సేవలు వంటి ప్రజా రవాణా సౌకర్యాలను ఉపయోగించుకోవాలని అధికారులు కోరారు.