న్యూఢిల్లీ: 27 దేశాల యూరోపియన్ యూనియన్ ఇద్దరు అగ్ర నాయకులైన ఆంటోనియో కోస్టా, ఉర్సులా వాన్ డెర్ లేయెన్, సోమవారం కర్తవ్యపథ్‌లో భారతదేశ 77వ గణతంత్ర దినోత్సవ వేడుకలను తిలకించారు. గత అనేక దశాబ్దాలుగా దేశపు అతిపెద్ద ఉత్సవ కార్యక్రమాన్ని అలంకరించిన కొద్దిమంది ప్రపంచ నాయకుల సరసన చేరారు. యూరోపియన్ కౌన్సిల్ అధ్యక్షుడు కోస్టా, యూరోపియన్ కమిషన్ అధ్యక్షుడు వాన్ డెర్ లేయన్, అధ్యక్షురాలు ద్రౌపది ముర్ము, ప్రధాన మంత్రి నరేంద్ర మోడీ, కేంద్ర మంత్రివర్గ సభ్యులు, విదేశీ దౌత్యవేత్తలు, అనేక మంది ఇతర ప్రముఖులతో కలిసి గ్రాండ్ మిలిటరీ కవాతు, సాంస్కృతిక ప్రదర్శనలను వీక్షించారు. యూరోపియన్ యూనియన్ (ఈయూ)కు చెందిన ఇద్దరు అగ్ర నాయకులు భారతదేశ గణతంత్ర దినోత్సవ వేడుకలకు ముఖ్య అతిథులుగా హాజరవడం ఇదే మొదటిసారి.