వాషింగ్టన్: హెచ్-1బీ వీసాపై డాక్టర్లకు మినహాయింపు లభించింది. ట్రంప్ పరిపాలన కొత్తగా ప్రవేశపెట్టిన అధిక నైపుణ్యం కలిగిన హెచ్-1B వీసా దరఖాస్తులపై 100,000 డాలర్ల రుసుము( H1B visa fee) నుండి వైద్యులకు మినహాయింపు ఇవ్వవచ్చని వైట్ హౌస్ సోమవారం సూచించింది. వైట్ హౌస్ ప్రతినిధి టేలర్ రోజర్స్(White House spokesperson Taylor Rogers) ఒక ప్రకటనలో ఇలా అన్నారు.  వైద్య నిపుణుల నియామకానికి హెచ్-1బీ వీసాలపై ఆరోగ్య వ్యవస్థలు ఆధార పడ్డాయి. దరఖాస్తు ఖర్చు వైద్య సిబ్బంది కొరతను మరింత తీవ్రతరం చేస్తుందని ఆసుపత్రులు, వైద్య బృందాలు హెచ్చరికలు లేవనెత్తిన తర్వాత ఈ స్పష్టత వచ్చింది. కొత్త నిబంధన నుంచి వైద్యులకు మినహాయింపు ఉంటుందని శ్వేతసౌధం ప్రతినిధి వెల్లడించారు.

ఆరోగ్య పరిశోధనా బృందం కేఎఫ్ఎఫ్ సంకలనం చేసిన సమాఖ్య డేటా ప్రకారం.. 76 మిలియన్లకు పైగా అమెరికన్లు ప్రస్తుతం ప్రాథమిక సంరక్షణ వైద్యులు తక్కువగా ఉన్న ప్రాంతాలలో నివసిస్తున్నారు. మిచిగాన్‌కు చెందిన హెడ్ అండ్ నెక్ సర్జన్, అమెరికన్ మెడికల్ అసోసియేషన్ (American Medical Association) అధ్యక్షుడు బాబీ ముక్కామల, వీసా రుసుము "రోగులు ఆధారపడే అధిక శిక్షణ పొందిన వైద్యుల పైప్‌లైన్‌ను మూసివేసే ప్రమాదం ఉంది, ముఖ్యంగా గ్రామీణ, వెనుకబడిన వర్గాలలో" అని హెచ్చరించారు.

అంతర్జాతీయ గ్రాడ్యుయేట్లు మా వైద్యుల శ్రామిక శక్తిలో కీలకమైన భాగమని ఆయన స్పష్టం చేశారు. ఫెడరల్ ఇమ్మిగ్రేషన్ రికార్డుల ప్రకారం, మాయో క్లినిక్, క్లీవ్‌ల్యాండ్ క్లినిక్, సెయింట్ జూడ్ చిల్డ్రన్స్ రీసెర్చ్ హాస్పిటల్ వంటి ప్రముఖ సంస్థలు హెచ్-1బీ వీసాలకు అగ్ర స్పాన్సర్‌లలో ఉన్నాయి. మాయో ఒక్కటే 300 కి పైగా ఆమోదించబడిన వీసాలను కలిగి ఉంది. అటువంటి సంస్థలకు, ప్రతిపాదిత రుసుము మిలియన్ల కొద్దీ అదనపు కార్మిక వ్యయాలను జోడించవచ్చని పేర్కొన్నారు. అధ్యక్షుడు డొనాల్డ్ ట్రంప్ సెప్టెంబర్ 19న ప్రకటనపై సంతకం చేశారు. హెచ్-1బీ వీసాలపై యుఎస్డీ 100,000 రుసుము విధించారు. కొంతమంది వలసేతర కార్మికుల ప్రవేశాన్ని పరిమితం చేసిన విషయం తెలిసిందే.