ఈ నెల 11 లేదా 20న నోటిఫికేషన్!

హైదరాబాద్, జనవరి 3 (విజయక్రాంతి): తెలంగాణలో మున్సిపల్ ఎన్నికల నగారా మోగనుంది. అందుకు మూహుర్తం కూడా సిద్ధమైంది. ఈ నెల 11 లేదా 20వ తేదీలోగా ఎన్నికల నోటిఫికేషన్ విడుదలయ్యే అవకాశం ఉంది. అందుకు తగ్గట్టుగా రాష్ట్ర ప్రభుత్వం, రాష్ట్ర ఎన్నికల కమిషన్ కసరత్తు మొదలు పెట్టాయి. రాష్ట్రంలో గడువు ముగిసిన 117 మున్సిపాలిటీ పాలక వర్గాలకు ఎన్నికలు నిర్వహించాలని ప్రభుత్వం ఇదివరకే నిర్ణయం తీసుకున్నది.

రాష్ట్ర ఎన్నికల సంఘం జనవరి 1న ముసాయిదా ఓటర్ల జాబితా ప్రకటించింది. 10న తుది జాబితాను వెలువరించనుంది. దాంతో 11వ తేదీన ఎన్నికల నోటిఫికేషన్ విడుదలయ్యే అవకాశం ఉంది. ఒక వేళ సక్రాంతి పండుగ, సెలవుల కారణంగా కుదరకపోతే ఈ నెల 20న నోటిఫికేషన్ విడుదల చేయనున్నారు. దీనికి అనుగుణంగా మిగతా ప్రక్రియ సజావుగా సాగేలా పురపాలక పట్టణాభివృద్ధి శాఖ సిద్ధమవుతోంది.