హైదరాబాద్: అల్లు అర్జున్ నటించిన పుష్ప-2 ప్రీమియర్ షో సందర్భంగా హైదరాబాద్‌లోని ఆర్టీసీ క్రాస్‌రోడ్‌లోని థియేటర్ వద్ద బుధవారం రాత్రి జరిగిన తొక్కిసలాటలో ఇద్దరు గాయపడగా, మహిళ మృతి చెందింది. సినిమా ప్రదర్శనను వీక్షించేందుకు అల్లు అర్జున్ ఆర్టీసీ క్రాస్ రోడ్స్ లోని సంధ్య థియేటర్‌కి వెళ్లారు. నటుడు థియేటర్‌లోకి ప్రవేశించి అభిమానులను పలకరించారు. దీంతో సినిమా ప్రీమియర్ షో చూసేందుకు గుమిగూడిన అభిమానులు థియేటర్ గేటు లోపలికి దూసుకొచ్చారు. దాంతో అక్కడ జరిగిన తొక్కిసలాటలో రేవతి అనే మహిళ మృతిచెందగా, ఆమె కొడుకు అపస్మారక స్థితిలోకి వెళ్లాడు. అప్పటికే అక్కడ మోహరించిన పోలీసులు లాఠీచార్జి చేసి జనాన్ని చెదరగొట్టారు. క్షతగాత్రులను బయటకు తీసి సురక్షిత ప్రాంతానికి తరలించి ప్రథమ చికిత్స అందించి ఆసుపత్రికి తరలించారు. పోలీసులు ఆ ప్రాంతాన్ని చుట్టుముట్టి థియేటర్ గేట్లను మూసివేశారు. థియేటర్‌లో ఎలాంటి ఇబ్బందులు తలెత్తకుండా మరిన్ని పోలీసు బందోబస్తును ఏర్పాటు చేశారు. దిల్ సుఖ్ నగర్ చెందిన మృతురాలు రేవతి తన భర్త భాస్కర్, ఇద్దరు  పిల్లలు కలిసి పుష్ప ప్రీమియర్ షో చూసేందుకు ఆర్టీసీ క్రాస్ రోడ్స్ లోని సంధ్య థియేటర్ కు వెళ్లారు.  ఈ ఘటన వారి కుటుంబంలో విషాదాన్ని నింపింది.