జగన్ ఫ్లెక్సీలతో అభిమానుల హల్ చల్

హైదరాబాద్: ఏపీ మాజీ ముఖ్యమంత్రి, వైఎస్సార్‌సీపీ అధ్యక్షుడు వైఎస్ జగన్ మోహన్ రెడ్డి(YS Jagan Mohan Reddy) గురువారం నాంపల్లి క్రిమినల్ కోర్టు కాంప్లెక్స్‌లోని ఆదాయానికి మించిన ఆస్తుల (డీఏ) కేసులపై దర్యాప్తు చేస్తున్న సీబీఐ ప్రత్యేక కోర్టుకు గట్టి భద్రత మధ్య హాజరయ్యారు. జగన్ మొదట విజయవాడ నుండి బేగంపేట విమానాశ్రయంలో దిగి, తరువాత రోడ్డు మార్గంలో కోర్టుకు వెళ్లారు. నాంపల్లి సీబీఐ కోర్టులో(Nampally CBI Court)  వైఎస్ జగన్ విచారణ ముగిసింది. కోర్టు హాల్లో జగన్ 5 నిమిషాలు మాత్రమే కూర్చొన్నారు. విచారణకు హాజరైనట్టు సీబీఐ కోర్టు రికార్డులో నమోదు చేసింది. జగన్ నాంపల్లి కోర్టు నుంచి లోటస్ పాండ్లోని తన నివాసానికి వెళ్లనున్నారు. నవంబర్ 21న లేదా అంతకు ముందు సీబీఐ దర్యాప్తు చేస్తున్న డీఏ కేసు విచారణకు సంబంధించి వ్యక్తిగతంగా హాజరు కావాలని కోర్టు ఆదేశాల మేరకు ఆయన కోర్టు ముందు హాజరయ్యారు. 

జగన్ మోహన్ రెడ్డి మినహాయింపు విజ్ఞప్తిని సీబీఐ తీవ్రంగా వ్యతిరేకించిన తర్వాత కోర్టు ఈ ఆదేశాలు ఇచ్చింది. జగన్ పర్యటన సందర్భంగా హైదరాబాద్ పోలీసులు(Hyderabad Police) గట్టి బందోబస్తు ఏర్పాటు చేశారు. జగన్ కాన్వాయ్(Jagan convoy) సజావుగా వెళ్లేందుకు పోలీసులు ట్రాఫిక్ ఆంక్షలు విధించారు. జగన్ అనుచరులు, వైఎస్ఆర్సీపీ నాయకులు పెద్ద సంఖ్యలో బేగంపేట విమానాశ్రయం, నాంపల్లి కోర్టు వద్దకు చేరుకుని ఆయనను చూసేందుకు ప్రయత్నించారు. వారిని నియంత్రించడం పోలీసులకు కష్టమైంది. జగన్ ఫ్లెక్సీలతో కోర్టు ఆవరణలో అభిమానులు హల్ చల్ చేశారు. 2029లో రప్పా రప్పా అంటూ జగన్ ఫొటోలతో ఫ్లెక్సీలు ఏర్పాటు చేశారు.   ముందు జాగ్రత్త చర్యగా, బయటి వ్యక్తులు కోర్టు సముదాయంలోకి ప్రవేశించకుండా పోలీసులు నిషేధించారు. సీబీఐ కోర్టు గేటు మూసివేసిన పోలీసులు న్యాయవాదులకు మాత్రమే కోర్టులోకి అనుమతించారు.