సిరీస్ పట్టేస్తారా?
నేడు విండీస్‌తో నాలుగో టీ20
- 2-1 ఆధిక్యంలో ఉన్న భారత్
- ఉప్పల్‌లోనూ పరుగుల వరదే
- తుది జట్టులో మార్పులు లేనట్టే
- రెండేళ్ల తర్వాత నగరంలో మ్యాచ్
* రసవత్తరంగా సాగుతున్న భారత్, వెస్టిండీస్ టీ20 సిరీస్ సందడి ఇప్పుడు భాగ్యనగరానికి వచ్చేసింది. హైదరాబాద్ ఉప్పల్ స్టేడియం వేదికగా బుధవారం నాలుగో టీ20 జరగనుంది. ఈ మ్యాచ్ గెలిచి సిరీస్ కైవసం చేసుకోవాలని భారత్ భావిస్తుంటే, సమం చేయాలని విండీస్ పట్టుదలగా ఉంది. బ్యాటింగ్ ప్యారడైజ్‌గా పేరున్న ఉప్పల్ పిచ్‌పై పరుగుల వరద ఖాయమని అంచనా.
హైదరాబాద్, అక్టోబర్ 13 : భారత్ , వెస్టిండీస్(India, West Indies) నాలుగో టీ ట్వంటీకి కౌంట్ డౌన్ మొదలయింది. హైదరాబాద్ ఉప్పల్ స్టేడియం(Hyderabad Uppal Stadium) వేదికగా బుధవారం మ్యాచ్ జరగబోతోంది.ప్రస్తుతం 5 మ్యాచ్‌ల ఈ సిరీస్‌లో భారత్ 2-1 ఆధిక్యంలో ఉంది. ఇండోడ్ వేదికగా జరిగిన మూడో టీ20లో భారత్ 14 పరుగుల తేడాతో విజయం సాధించి మంచి ఫామ్‌లో ఉంది. శ్రేయాస్ అయ్యర్(Shreyas Iyer) సారథ్యంలోని భారత జట్టు(Indian team) ఈ మ్యాచ్ గెలిస్తే మరో మ్యాచ్ మిగిలి ఉండగానే సిరీస్‌ను కైవసం చేసుకుంటుంది. మరోవైపు సిరీస్ ఆశలు సజీవంగా ఉంచుకోవాలంటే వెస్టిండీస్ తప్పక గెలవాల్సిన పరిస్థితి.
భారత తుది జట్టు కూర్పులో మార్పులకు అవకాశం లేదని తెలుస్తోంది. విన్నింగ్ కాంబినేషన్‌నే కొనసాగించాలని గంభీర్ భావిస్తున్నట్టు సమాచారం. దీని ప్రకారం చూస్తే వైభవ్ సూర్యవంశీ బెంచ్‌కే పరిమితం కానున్నాడు. సంజూ శాంసన్, అభిషేక్ శర్మ ఓపెనింగ్ జోడీనే కంటిన్యూ చేయనున్నట్టు తెలుస్తోంది. మూడో స్థానంలో ఇషాన్ కిషన్, నాలుగో స్థానంలో కెప్టెన్ శ్రేయస్ అయ్యర్, ఐదో స్థానంలో తిలక్ వర్మ బ్యాటింగ్‌కు రానున్నారు. కాగా తెలుగు ప్లేయర్స్ తిలక్ వర్మ, నితీష్ కుమార్ రెడ్డి ఆట కోసం అభిమానులు ఆసక్తిగా ఎదురుచూస్తున్నారు.
వీరిద్దరూ మంచి ఇన్నింగ్స్‌లు ఆడాలని వారు కోరుకుంటున్నారు. సన్‌రైజర్స్ హైదరాబాద్ తరఫున ఆడే అభిషేక్ శర్మ, నితీష్ కుమార్ రెడ్డి, ఇషాన్ కిషన్‌లకు ఉప్పల్ హోమ్ గ్రౌండ్ కావడంతో ఇక్కడి పరిస్థితులపై వారికి మంచి అవగాహన ఉంది. గత మ్యాచ్‌లో అభిషేక్ శర్మ అద్భుతమైన ఫామ్‌లో అదరగొట్టాడు.ఇదిలా ఉంటే ఈ మ్యాచ్‌లోనూ ముగ్గురు టీమిండియా ముగ్గురు ఆల్‌రౌండర్లను కొనసాగించే అవకాశం ఉంది. నమన్ ధీర్, నితీష్ కుమార్ రెడ్డి, అక్షర్ పటేల్ కొనసాగనున్నారు.
పేసర్లుగా అర్ష్దీప్ సింగ్, మయాంక్ యాదవ్‌లతో బరిలోకి దిగడం ఖాయమైనట్టే. ఈ నేపథ్యంలో స్పెషలిస్ట్ స్పిన్నర్‌గా కుల్దీప్‌కు ప్లేస్ లేనట్టే. మరోవైపు సిరీస్‌లో వెనుకబడినా విండీస్‌ను తక్కువ అంచనా వేసేందుకు వీలు లేదు. ఎందుకంటే రెండో టీ20లో 250 ప్లస్ స్కోరు అలవోకగా ఛేదించిన కరేబియన్ టీమ్‌లో చాలా మంది హిట్టర్స్ ఉన్నారు. కెప్టెన్ షాయ్ హోప్ నేతృత్వంలోని వెస్టిండీస్ జట్టు భారత్ గట్టి సవాల్ విసురుతోంది. హోప్‌ను త్వరగానే ఔట్ చేస్తే భారత్‌కు విజయావకాశాలుంటాయి.
హెట్‌మెయిన్, పావెల్, పూరన్, రూథరఫర్డ్ లాంటి హిట్టర్లతో కూడిన విండీస్ జట్టు బలంగా ఉంది. ఇక హైదరాబాద్ ఉప్పల్ పిచ్ ఎప్పుడూ బ్యాటర్లకు స్వర్గధామంగా ఉంటుంది. భారత్ టీ20ల్లో అత్యధిక స్కోరు సాధించింది ఇక్కడే. కొత్త పిచ్ సిద్ధం చేసామని చెబుతున్నా బ్యాటింగ్‌కే అనుకూలంగా ఉంటుందని అంచనా. దీంతో టాస్ కీలకం కాబోతోంది. పైగా ఇరు జట్లలోనూ టీ ట్వంటీ హిట్టర్స్ ఉండడంతో మరోసారి భారీ స్కోర్లు నమోదవడం ఖాయంగా కనిపిస్తోంది.
తుది జట్ల అంచనా:
భారత్ : అభిషేక్ శర్మ, సంజూ శాంసన్, ఇషాన్ కిషన్, శ్రేయస్ అయ్యర్, శివమ్ దూబే, తిలక్ వర్మ, అక్షర్ పటేల్, నమన్ ధీర్, కుల్దీప్ యాదవ్, అర్షదీప్ సింగ్, మయాంక్ యాదవ్
వెస్టిండీస్: కామిల్ పూరన్, షై హోప్, హెట్‌మెయిర్, రోస్టన్ ఛేజ్, రోవ్‌మన్ పావెల్, షెర్పాన్ రూథర్‌ఫర్డ్, కీమో పాల్, రొమారియో షెపర్డ్, మాథ్యూ ఫోర్డ్, అకిల్ హోస్నేన్, సమర్ జోసెఫ్
