భయం గుప్పెట్లో మణుగూరు ప్రజలు!
- నాలుగుసార్లు భూప్రకంపనలు.. బ్లాస్టింగ్ సమయం కాకపోవడంతో అంతుచిక్కని కారణాలపై అనుమానాలు!
- ప్రకంపనలతో ఇళ్లలో దడ.. బ్రాడ్బ్యాండ్, టెలిఫోన్ సేవలకు అంతరాయం..
- అధికారుల వివరణ కోసం ప్రజల ఎదురుచూపులు
మణుగూరు, నవంబర్ 17(విజయ క్రాంతి ): భద్రాద్రి కొత్తగూడెం జిల్లా మణుగూరు ప్రాంతంలో(Manuguru region) మంగళవారం చోటుచేసుకున్న వరుస భూప్రకంపనలు(Earth tremors) ప్రజలను తీవ్ర భయాందోళనలకు గురిచేశాయి. ఒకే రోజు సుమారు నాలుగుసార్లు భూమి కంపించినట్లు వివిధ ప్రాంతాల ప్రజలు చెబుతుండటంతో స్థానికంగా కలకలం రేగింది. అసలు ప్రకంపనలకు కారణమేంటో తెలియక ప్రజలు ఆందోళన చెందుతున్నారు.
మంగళవారం ఉదయం 11:28 గంటల సమయంలో మలపల్లి ఓపెన్కాస్ట్ ప్రాంతంలో భూమి కంపించినట్లు సమాచారం. అనంతరం 11:40 గంటల సమయంలో శివలింగాపురంలో వరుసగా మూడుసార్లు పెద్ద శబ్దాలు వినిపించాయని, ఇళ్ల పైకప్పులు సైతం కంపించినట్లు అనిపించిందని స్థానికులు తెలిపారు. మణుగూరు పట్టణంతో పాటు పలు ప్రాంతాల్లోనూ ప్రకంపనలు అనుభూతి చెందినట్లు ప్రజలు వెల్లడిస్తున్నారు.
బ్లాస్టింగ్ సమయం కాకపోవడంతో అనుమానాలు!
మణుగూరు ప్రాంతం సింగరేణి బొగ్గు గనులు, ఓపెన్కాస్ట్ ప్రాజెక్టులు, భూగర్భ గనులకు కేంద్రంగా ఉంది. సాధారణంగా బ్లాస్టింగ్ సమయంలో ప్రకంపనలు వచ్చే అవకాశం ఉన్నప్పటికీ, ఈ ఘటన జరిగిన సమయంలో బ్లాస్టింగ్ సమయం కాదని స్థానికులు చెబుతున్నారు. దీంతో ప్రకంపనలకు గల అసలు కారణంపై సందేహాలు వ్యక్తమవుతున్నాయి.
బ్రాడ్బ్యాండ్, టెలిఫోన్ సేవలకు అంతరాయం!
ప్రకంపనలు చోటుచేసుకున్న సమయంలో పలు ప్రాంతాల్లో బ్రాడ్బ్యాండ్ ఇంటర్నెట్ సేవలు నిలిచిపోయాయని, టెలిఫోన్ సిగ్నల్స్లోనూ అంతరాయం ఏర్పడిందని స్థానికులు చెబుతున్నారు. అయితే ఈ అంతరాయాలకు ప్రకంపనలతో సంబంధం ఉందా? లేక సాంకేతిక సమస్యలే కారణమా? అన్నది స్పష్టత రావాల్సి ఉంది.
అధికారులు స్పందించాలి.. ప్రజలకు భరోసా కల్పించాలి!
గతంలోనూ ఇలాంటి ప్రకంపనలు అనుభూతి చెందిన సందర్భాలు ఉన్నాయని స్థానికులు గుర్తుచేస్తున్నారు. జిల్లా కలెక్టర్, సింగరేణి యాజమాన్యం, మైనింగ్ శాఖ అధికారులు తక్షణమే స్పందించి ఘటనపై సమగ్ర విచారణ చేపట్టాలని ప్రజలు కోరుతున్నారు. భూకంప పరిశీలన నిపుణులతో క్షేత్రస్థాయిలో తనిఖీలు నిర్వహించి ప్రకంపనల తీవ్రత, కేంద్ర స్థానం, కారణాలను గుర్తించాలని డిమాండ్ చేస్తున్నారు.
అదేవిధంగా బ్లాస్టింగ్ రికార్డులు, మైనింగ్ కార్యకలాపాల వివరాలను పరిశీలించి ప్రజలకు వాస్తవాలను వెల్లడించాలని కోరుతున్నారు. తరచూ భూమి కంపిస్తుండటంతో భయాందోళనల మధ్య జీవిస్తున్న మణుగూరు ప్రజలకు అధికారులు భద్రతపై భరోసా కల్పించాలని, అధికారిక ప్రకటన విడుదల చేసి అనుమానాలకు తెరదించాలని స్థానికులు డిమాండ్ చేస్తున్నారు.