కస్టమర్లు జియోకు.. స్పీడ్ మాత్రం ఎయిర్‌టెల్‌కు!
దేశంలో హోమ్ బ్రాడ్‌బ్యాండ్ సేవల విషయంలో టెలికాం సంస్థల మధ్య పోటీ ఆసక్తికరంగా మారింది. వినియోగదారుల సంఖ్యలో జియో అగ్రస్థానంలో కొనసాగుతుండగా.. ఇంటర్నెట్ వేగం, నెట్‌వర్క్ నాణ్యతలో మాత్రం భారతి ఎయిర్‌టెల్ ఆధిపత్యం ప్రదర్శిస్తోంది. ప్రముఖ నెట్‌వర్క్ విశ్లేషణ సంస్థ ఓపెన్‌సిగ్నల్ (OpenSignal) విడుదల చేసిన తాజా నివేదికలో ఎయిర్‌టెల్ అగ్రస్థానాన్ని దక్కించుకుంది. డౌన్‌లోడ్ వేగం నుంచి వీడియో వీక్షణ నాణ్యత వరకు పలు కీలక విభాగాల్లో ప్రత్యర్థి సంస్థలకు గట్టి పోటీనిస్తూ ముందంజలో నిలిచింది.
హోమ్ బ్రాడ్‌బ్యాండ్ సేవలకు సంబంధించి ఓపెన్‌సిగ్నల్ ఐదు ప్రధాన విభాగాల్లో పరీక్షలు నిర్వహించింది. బ్రాడ్‌బ్యాండ్ విశ్వసనీయత, నెట్‌వర్క్ స్థిరత్వం, డౌన్‌లోడ్ వేగం, అప్‌లోడ్ వేగం, వీడియో ప్లేబ్యాక్ అనుభవాలను పరిశీలించింది. ఈ పరీక్షల్లో ఎయిర్‌టెల్ అత్యుత్తమ ఫలితాలు సాధించింది.
నెట్‌వర్క్ విశ్వసనీయత విభాగంలో ఎయిర్‌టెల్ 486 పాయింట్లతో మొదటి స్థానంలో నిలిచింది. జియో 423 పాయింట్లతో రెండో స్థానానికి పరిమితమైంది. డౌన్‌లోడ్, అప్‌లోడ్ వేగాల్లోనూ జియోతో పోలిస్తే ఎయిర్‌టెల్ దాదాపు 26 నుంచి 27 శాతం అధిక వేగాన్ని నమోదు చేసింది.
ఈ నివేదికలో ప్రభుత్వ రంగ టెలికాం సంస్థ బీఎస్ఎన్ఎల్ (BSNL) పనితీరు కూడా ప్రత్యేక ఆకర్షణగా నిలిచింది. ఇంటర్నెట్ వేగం విషయంలో ఎయిర్‌టెల్‌కు అత్యంత చేరువలో నిలిచింది. డౌన్‌లోడ్ వేగంలో కేవలం 0.5 ఎంబీపీఎస్, అప్‌లోడ్ వేగంలో 0.8 ఎంబీపీఎస్ తేడాతో రెండో స్థానాన్ని దక్కించుకుంది. దీంతో బీఎస్ఎన్ఎల్ బ్రాడ్‌బ్యాండ్ సేవల్లోనూ నాణ్యత మెరుగుపడుతున్నట్లు ఈ ఫలితాలు సూచిస్తున్నాయి.
ప్రస్తుతం వేగంగా ప్రాచుర్యం పొందుతున్న 5జీ ఆధారిత ఎయిర్‌ఫైబర్ సేవల్లోనూ ఎయిర్‌టెల్ తన ఆధిపత్యాన్ని చాటుకుంది. ఎయిర్‌టెల్ ఎక్స్‌స్ట్రీమ్ ఎయిర్‌ఫైబర్ (Airtel Xstream AirFiber) సగటున 32.4 ఎంబీపీఎస్ డౌన్‌లోడ్ వేగాన్ని అందించగా, జియో ఎయిర్‌ఫైబర్ 25.7 ఎంబీపీఎస్‌తో సరిపెట్టుకుంది. అప్‌లోడ్ వేగంలోనూ ఎయిర్‌టెల్ 20.7 ఎంబీపీఎస్‌తో ముందంజలో నిలిచింది.
హెచ్‌డీ వీడియోలను ఎలాంటి అంతరాయం లేకుండా వీక్షించే అనుభవంలోనూ ఎయిర్‌టెల్ 66.2 శాతం స్కోరు సాధించింది. దీంతో నాణ్యమైన వీడియో స్ట్రీమింగ్ (Video Streaming) కోరుకునే వినియోగదారులకు ఎయిర్‌టెల్ మెరుగైన ఎంపికగా నిలుస్తోంది.
ఇంటర్నెట్ వేగం, నెట్‌వర్క్ నాణ్యతలో ఎయిర్‌టెల్ విజేతగా నిలిచినా.. వినియోగదారుల సంఖ్యలో మాత్రం జియో తన ఆధిపత్యాన్ని కొనసాగిస్తోంది. టెలికాం నియంత్రణ సంస్థ ట్రాయ్ గణాంకాల ప్రకారం హోమ్ బ్రాడ్‌బ్యాండ్ విభాగంలో జియోకు 1.48 కోట్ల మంది చందాదారులు ఉన్నారు. ఎయిర్‌టెల్ 1.14 కోట్ల మంది వినియోగదారులతో రెండో స్థానంలో కొనసాగుతోంది. బీఎస్ఎన్ఎల్ 46 లక్షల మంది చందాదారులతో మూడో స్థానంలో ఉంది.
మొత్తంగా వినియోగదారుల సంఖ్యలో జియో, ఇంటర్నెట్ వేగం, నెట్‌వర్క్ నాణ్యతలో ఎయిర్‌టెల్ ఆధిపత్యం ప్రదర్శిస్తుండగా.. వేగం విషయంలో బీఎస్ఎన్ఎల్ కూడా గట్టి పోటీ ఇస్తోంది. ఈ మూడు సంస్థల మధ్య కొనసాగుతున్న పోటీ రాబోయే రోజుల్లో హోమ్ బ్రాడ్‌బ్యాండ్ రంగంలో ఎలాంటి మార్పులకు దారితీస్తుందో ఆసక్తికరంగా మారింది.
