అమ్మ ఒడిలో ఉండాల్సిన పసిప్రాణం.. కవర్‌లో చుట్టి నాలీలోకి
ఆసిఫాబాద్ (విజయక్రాంతి): ఆ పసికందు ఏం పాపం చేసింది? అమ్మ ఒడిలో వెచ్చగా ఉండాల్సిన ఆ చిన్నారి.. మురికి నాలీలో విగతజీవిగా కనిపించింది. ఇంకా లోకాన్ని పూర్తిగా చూడని ఆ పసిప్రాణం ఎవరికీ భారమైందో.. ఎవరి నిర్లక్ష్యానికి బలైందో తెలియదు. కవర్‌లో చుట్టి నాలీలో వదిలేసిన పసికందు మృతదేహం వెలుగులోకి రావడంతో స్థానికులు కన్నీటి పర్యంతమయ్యారు.
కొమురం భీం ఆసిఫాబాద్ జిల్లా చింతలమానేపల్లి మండలం దిందా గ్రామ శివారులో గురువారం ఈ హృదయ విదారక ఘటన (Heartbreaking Incident) చోటుచేసుకుంది. నాలీలో కవర్‌లో చుట్టి ఉన్న పసికందు మృతదేహాన్ని కుక్కలు బయటకు లాగడంతో స్థానికులు గుర్తించారు. ఈ దృశ్యం చూసిన వారంతా తీవ్ర ఆవేదనకు గురయ్యారు. నవమాసాలు మోసి కన్న తల్లి ఒడిలో ఆడుకోవాల్సిన పసికందు ఇలా విగతజీవిగా కనిపించడం గ్రామస్థులను కలచివేసింది.
ఘటనపై సమాచారం అందుకున్న పోలీసులు (Police Investigation) వెంటనే సంఘటనా స్థలానికి చేరుకుని వివరాలు సేకరించారు. పసికందును అక్కడ వదిలి వెళ్లిన గుర్తుతెలియని వ్యక్తుల కోసం గాలింపు చేపట్టారు. కేసు నమోదు చేసి సమీప ప్రాంతాల్లోని సీసీ కెమెరాల దృశ్యాలను పరిశీలిస్తున్నారు.
పసికందు మృతదేహం అక్కడికి ఎలా చేరింది? ఈ ఘటనకు కారకులెవరు? అనే కోణాల్లో దర్యాప్తు కొనసాగిస్తున్నారు. ఈ పసిప్రాణం మృతికి సంబంధించిన వాస్తవాలు వెలుగులోకి రావాలని, బాధ్యులను గుర్తించి చట్టపరమైన చర్యలు తీసుకోవాలని స్థానికులు కోరుతున్నారు.
