ఎల్ఐసీ నుంచి కొత్త ప్లాన్

LIC Health Shield Plan-907: వైద్య ఖర్చులు రోజురోజుకూ పెరుగుతున్న నేపథ్యంలో భారతీయ జీవిత బీమా సంస్థ (LIC) కొత్త ఆరోగ్య బీమా పథకాన్ని అందుబాటులోకి తెచ్చింది. ‘LIC హెల్త్ షీల్డ్ ప్లాన్ 907’ పేరుతో తీసుకొచ్చిన ఈ పథకం ద్వారా ఆసుపత్రిలో చికిత్స పొందే సమయంలో పాలసీ నిబంధనల ప్రకారం నగదు ప్రయోజనాలు పొందవచ్చు.

ఏమిటీ హెల్త్ షీల్డ్ ప్లాన్ 907?

ఇది నాన్-లింక్డ్, నాన్-పార్టిసిపేటింగ్ వ్యక్తిగత ఆరోగ్య బీమా పథకం. అంటే మార్కెట్ ఒడిదుడుకులతో సంబంధం లేకుండా ముందుగా నిర్ణయించిన ప్రయోజనాలను అందించే విధంగా రూపొందించారు. ఈ పాలసీ కాలపరిమితి 15 ఏళ్లు. ప్రారంభ రోజువారీ ప్రయోజనాన్ని రూ.2,500 నుంచి రూ.10,000 వరకు ఎంచుకోవచ్చు.

పాలసీలో ఎలాంటి ప్రయోజనాలు ఉన్నాయి?

• ఆసుపత్రిలో చేరినప్పుడు రోజువారీ నగదు ప్రయోజనం.
• అర్హత కలిగిన ప్రధాన శస్త్రచికిత్సలకు ఒకేసారి ఆర్థిక ప్రయోజనం.
• ఎంపిక చేసిన డే కేర్ చికిత్సలకు నగదు ప్రయోజనం.
• ఇతర అర్హత కలిగిన శస్త్రచికిత్సలకు ప్రయోజనాలు.
• నిర్దిష్ట వైద్య చికిత్సల సమయంలో అదనపు ఆర్థిక సహాయం.
• దీర్ఘకాలం ఆసుపత్రిలో ఉండాల్సి వస్తే ఎక్స్‌టెండెడ్ హాస్పిటలైజేషన్ ప్రయోజనం.
• పాలసీ నిబంధనల ప్రకారం ఆరోగ్య పరీక్షల ప్రయోజనం.
• క్లెయిమ్‌ చేయని సంవత్సరాలకు నో క్లెయిమ్ బెనిఫిట్ ద్వారా రోజువారీ ప్రయోజనం పెరిగే అవకాశం.

వెయిటింగ్ పీరియడ్, ప్రమాదాలకు వర్తింపు

అనారోగ్యానికి సంబంధించిన క్లెయిమ్‌లకు సాధారణంగా 90 రోజుల వెయిటింగ్ పీరియడ్ ఉంటుంది. ప్రమాదాల కారణంగా ఏర్పడిన గాయాలకు మాత్రం పాలసీ ప్రారంభం నుంచే నిర్దిష్ట నిబంధనల ప్రకారం ప్రయోజనాలు వర్తిస్తాయి.

సాధారణ హెల్త్ ఇన్సూరెన్స్‌కు ప్రత్యామ్నాయమా?

ఈ ప్లాన్ సాధారణ హెల్త్ ఇన్సూరెన్స్‌కు పూర్తి ప్రత్యామ్నాయం కాదు. సాధారణ ఆరోగ్య బీమాలో అర్హత కలిగిన ఆసుపత్రి ఖర్చులను పాలసీ పరిమితుల మేరకు చెల్లిస్తారు. హెల్త్ షీల్డ్‌లో మాత్రం ముందుగా నిర్ణయించిన నగదు ప్రయోజనాలు అందిస్తారు. కాబట్టి ఇప్పటికే ఆరోగ్య బీమా ఉన్నవారు అదనపు ఆర్థిక రక్షణ కోసం ఈ పథకాన్ని పరిశీలించవచ్చు. పాలసీ తీసుకునే ముందు ప్రీమియం, అర్హతలు, మినహాయింపులు, క్లెయిమ్ పరిమితులు, వెయిటింగ్ పీరియడ్ వంటి అంశాలను ఎల్ఐసీ  అధికారిక పాలసీ పత్రంలో పరిశీలించాలని నిపుణులు సూచిస్తున్నారు.