బేకరీలో కుళ్లిన తినుబండారాలు

21-11-2026 | 12:13pm

రాజాపూర్, నవంబర్ 20 (విజయక్రాంతి): మండల కేంద్రంలోని బస్టాండ్ సమీపంలో ఉన్న కేక్ హౌస్ (Cake House) బేకరీలో కుళ్లిపోయి, బూజు పట్టిన కేకులు, స్వీట్లు, క్రీమ్ బన్నులు విక్రయిస్తూ ప్రజల ఆరోగ్యాలతో చెలగాటమాడుతున్నారు. బేకరీలోని గాజు అరల్లో ప్రదర్శనకు ఉంచిన వివిధ రకాల తినుబండారాలు కుళ్లిపోయి కనిపిస్తున్నా నిర్వాహకులు పట్టించుకోకుండా విక్రయాలు కొనసాగిస్తున్నారు.

జిల్లా ఉన్నత పాఠశాల పక్కనే ఈ బేకరీ ఉండటంతో విద్యార్థులు సైతం ఇటువంటి కలుషిత ఆహార పదార్థాలను కొనుగోలు చేసి తినే ప్రమాదం ఉంది. తెలియక వాటిని తిన్నవారు అనారోగ్యానికి గురయ్యే అవకాశం ఉందని స్థానికులు ఆందోళన వ్యక్తం చేస్తున్నారు.

ఆహార భద్రతా నిబంధనలు (Food Safety Rules) పాటించకుండా నాణ్యత లేని తినుబండారాలను విక్రయిస్తున్న నిర్వాహకులపై అధికారులు కఠిన చర్యలు తీసుకోవాలని ప్రజలు కోరుతున్నారు. మండల కేంద్రంలోని హోటళ్లు, బేకరీలపై ఫుడ్ సేఫ్టీ (Food Safety) అధికారులు కనీస తనిఖీలు కూడా నిర్వహించడం లేదని విమర్శిస్తున్నారు. ఇప్పటికైనా సంబంధిత అధికారులు స్పందించి తనిఖీలు (Inspections) చేపట్టి, ప్రజల ఆరోగ్యాలతో చెలగాటమాడుతున్న వారిపై చర్యలు తీసుకోవాలని మండల ప్రజలు డిమాండ్ చేస్తున్నారు.

మరిన్ని వార్తలు