న్యూఢిల్లీ, నవంబర్ 30: భారత్ ఎయిర్‌లైన్స్ వాడే ఎయిర్‌బస్ ఏ320 విమానాల్లో సాఫ్ట్‌వేర్ అప్‌డేట్ సమస్యను పరిష్కరించామని డీజీసీఏ ఆదివారం తెలిపింది. మొత్తం 323 విమానాల్లో సాఫ్ట్‌వేర్‌ను అప్‌డేట్ చేశామని చెప్పింది. భారత్ ఎయిర్‌బస్‌కు చెందిన ఏ 320 రకం 338 విమానాలను వినియోగిస్తోంది. ఇవి ప్రధానంగా ఇండిగో, ఎయిర్ ఇండియా, ఇండియా ఎక్స్‌ప్రెస్ వద్ద ఉన్నాయి. వీటిల్లో 323 మాత్రమే ప్రస్తుతం విధుల్లో ఉండగా, ఆరు మెయింటెనెన్స్‌లో ఉన్నాయి.

మరో 9 విమానాలకు ఏ రకమైన సాంకేతిక పునరుద్ధరణ అవసరం లేదని డీజీసీఏ అధికారులు పేర్కొన్నారు. సూర్యుడి వేడి(కాస్మిక్ రేడియేషన్) కారణంగా ఎయిర్‌బస్ ఏ320 విమానాల్లో సాఫ్టవేర్ వ్యవస్థ దెబ్బతింటున్నాయి. ఫలితంగా సాంకేతిక సమస్యలు ఉత్పన్నమవుతున్నాయి. శనివారం సాంకేతిక సమస్య వల్ల భారత్ సహా ప్రపంచవ్యాప్తంగా 6 వేల ఎయిర్‌బస్ విమానాలకు సాఫ్ట్‌వేర్ అప్‌గ్రేడ్ అవసరమైన విషయం తెలిసిందే.

భారతీయ విమానయాన సంస్థలు ఉపయోగిస్తున్న 323 ఏ320 విమానాలలో సాఫ్ట్‌వేర్‌ను అప్‌డేట్ పూర్తిచేశాయని  డైరెక్టరేట్ జనరల్ ఆఫ్ సివిల్ ఏవియేషన్(డీజీసీఏ) ప్రకటించింది. ప్రభావితమైన 209 విమానాలలో నాలుగు మాత్రమే ఇప్పటికీ నిర్వహణ అవసరమని అమెరికన్ ఎయిర్లైన్స్ శనివారం ప్రకటించింది. ఇంతలో, డెల్టా ఎయిర్ లైన్స్ ఇంక్, యునైటెడ్ ఎయిర్లైన్స్ ఇంక్ సంస్థలు ఏ320 విమానాల్లో సాఫ్ట్‌వేర్ సమస్య తమ కార్యకలాపాలపై రేడియేషన్ రిస్క్ ఎటువంటి ప్రభావమూ చూపలేదని పేర్కొన్నాయి. ఇండిగో తన మొత్తం ఏ320- మోడల్ విమానాలన్నింటిలో  ఎయిర్‌బస్ అప్‌గ్రేడ్ పూర్తయినట్లు తెలియజేసింది. మొత్తం 200 విమానాలు ఇప్పుడు తాజా భద్రతా అవసరాలకు పూర్తిగా అనుగుణంగా ఉన్నాయని పేర్కొంది.