-అంతర్జాతీయ వేదికలపై తెలంగాణ సాంస్కృతిక వారసత్వం

-స్థానిక హస్తకళలకు ప్రత్యేక గుర్తింపు

-యూత్ సంకల్పమే ‘వికసిత్ భారత్’

-28వ ‘మన్ కీ బాత్’లో ప్రధాని మోదీ

న్యూఢిల్లీ, నవంబర్ 30 : కరీంనగర్‌లో తయారయ్యే సంప్రదాయ సిల్వర్ కళాకృతులు భళా అంటూ ప్రధాని నరేంద్ర మోదీ కితాబిచ్చారు. అవి అంతర్జాతీయ వేదికలపై భారతీయ సాంస్కృతిక గొప్పతనాన్ని ప్రతిబింబిస్తున్నాయని ప్రశంసించారు. ప్రధాని నరేంద్ర మోదీ శనివారం 128వ ‘మన్ కీ బాత్’ కార్యక్రమంలో కరీంనగర్ జిల్లాకు ప్ర త్యేక ప్రాధాన్యత కల్పించారు. వివిధ దేశా ల ప్రధాన మంత్రులకు ఇచ్చిన బహుమతుల్లో కరీంనగర్ హస్తకళలు ఉన్నాయని పేర్కొన్నా రు.

ముఖ్యంగా అక్కడి కళాకారులు తయా రు చేసిన సంప్రదాయ వెండి బుద్ధుడి ప్రతిమను జపాన్ ప్రధానికి బహూకరించినట్లు చెప్పారు. అదే విధంగా పూల ఆకృతిలో రూ పొందించిన సిల్వర్ మిర్రర్‌ను ఇటలీ ప్రధానికి అందజేశానని ఆయన గుర్తుచేశారు. కరీంనగర్ కళాకారుల ప్రతిభను ప్రపంచానికి పరిచయం చేసే అవకాశం దొరికినందు కు సంతోషం వ్యక్తం చేస్తున్నానని తెలిపారు. భారత హస్తకళలను ప్రపంచం మరితంగా తెలుసుకునేలా ప్రభుత్వం కొనసాగిస్తున్న ప్రయత్నాలను ప్రధాని  వివరించారు.  

వైఫల్యాలే విజయానికి తొలి అడుగు

డ్రోన్ పోటీలో యువత చూపిన పట్టుదల ఇస్రో సైంటిస్టుల నిబద్ధత ఒక్కటేనని ప్రధాని మోదీ ప్రశంసించారు. చంద్రయాన్ ఫలితంతో నిరాశ చెందిన శాస్త్రవేత్తలు అదే రోజు చంద్రయాన్ విజయగాథ రాయడం మొదలు పెట్టారని చెప్పారు. వైఫల్యాలే విజయానికి తొలి అడుగు. పరిశోధన రంగంలో భారత్ దూసుకుపోతోందని తెలిపారు.

యువతరం సంకల్పమే ‘వికసిత భారత్’

ప్రపంచంలో ఏదైనా సాధించే సత్తా భారత్‌కు ఉందని ప్రధాని అన్నారు. యువత అసమాన శక్తి, బలమైన సంకల్పంతో దేశాన్ని అభివృద్ధి పథంలో నడిపిస్తోందని పేర్కొన్నారు. యువతరం సంకల్పమే ‘వికసిత భారత్’ అని టెక్నాలజీ అభివృద్ధిలో వారి కృషి కీలకమని చెప్పారు. గడిచిన 11 ఏళ్లలో విజ్ఞానం, క్రీడలు, సామాజిక సేవ, సంస్కృతి వంటి వివిధ రంగాల్లో యువత అద్భుతమైన ప్రతిభ కనబరిచారని ప్రశంసించారు. కష్టతరమైన వాటిని కూడా భారత్ సాధిస్తోందని.. మహిళల అంధుల క్రికెట్ జట్టు ప్రపంచకప్ గెలిచి చరిత్ర సృష్టించిందని పేర్కొన్నారు. స్టార్టప్ ఇండియా, స్కిల్ ఇండియా, డిజిటల్ ఇండియా, వంటి సంస్కరణలతో భారత యువత ‘వికసిత్ భారత్’  కలను సాకారం చేస్తారని తాను బలంగా విశ్వసిస్తున్నట్లు ప్రధాని చెప్పారు.

హైదరాబాద్‌లో ఎంఆర్‌ఓ ఓ మైలురాయి

నవంబర్ నెలలో దేశంలో వెలుగుచూసి న ఎన్నో అంశాలు తనకు స్ఫూర్తినిచ్చాయని ప్రధాని మోదీ చెప్పారు. హైదరాబాద్‌లో ఇంజన్ మెయింటెనెన్స్ రిపేర్ ఓవర్హాల్ (ఎమ్‌ఆర్‌ఓ) కేంద్రం కూడా ఓ మైలురాయి అ ని వ్యాఖ్యానించారు. మాహే నౌకను నావికాదళంలో ప్రవేశపెట్టడం, స్కైరూట్ ఇన్ఫినిటీ క్యాంపస్ ప్రారంభం కావడం భారతీయ సృజనాత్మకతకు, యువత శక్తికి నిదర్శనమని ప్రధాని అన్నారు.

గత పదేళ్లల్లో ధాన్యం ఉత్పత్తి 100 మిలియన్ టన్నుల నుంచి 357 మిలియన్ టన్నులకు పెరగడం వ్యవసాయ రంగంలో ఒక మైలురాయి అని అభివర్ణించారు. కామన్వెల్త్ క్రీడలకు ఆతిథ్యం ఇవ్వనున్న భారత్ క్రీడా రంగంలో తన సత్తా ప్రపంచ వ్యాప్తం చేస్తోందన్నారు. మనసులో పట్టుదల, వైఫల్యాలను తట్టుకుని నిలబడగలిగే ధైర్యం ఉంటే విజయం తప్పక సాధిస్తామని ప్రధాని తెలిపారు.