గత బడ్జెట్‌లో రూ. 11,405 కోట్లే 

ఈసారి కేటాయింపుల్లో 1,106 కోట్ల పెరుగుదల

బీసీ శాఖకు నిధుల కేటాయింపుల్లో 10 శాతం వృద్ధి

హైదరాబాద్, మార్చి 20 (విజయక్రాంతి) : రాష్ట్ర ప్రభుత్వం 2026 ఆర్థిక సంవత్సర బడ్జెట్‌లో బీసీ సంక్షేమానికి రూ. 12,511 కోట్లు కేటాయించింది. గత ఆర్థిక సంవత్సరం (2025 బీసీలకు రూ. 11,405 కోట్లు కేటాయించగా, ఈసారి రూ. 1,106 కోట్ల మేర పెంచింది. గత బడ్జెట్‌తో పోలిస్తే ఈసారి కేటాయింపుల్లో దాదాపు 10 శాతం వృద్ధి గమనార్హం. రాష్ట్రంలో బీసీ వర్గాలు పెద్ద సంఖ్యలో ఉండటంతో, వారి విద్య, ఉపాధి, ఆర్థిక అభివృద్ధికి ప్రభుత్వం మరింత దృష్టి సారించినట్టు ఈ బడ్జెట్ సంకేతాలు ఇస్తోంది.

ముఖ్యంగా బీసీ యువతను ఆర్థికంగా బలపరచడం, స్వయం ఉపాధి అవకాశాలు పెంచడం, సంప్రదాయ వృత్తులను పునరుద్ధరించడం ప్రధాన లక్ష్యాలుగా కనిపిస్తున్నాయి. బడ్జెట్‌లో భాగంగా బీసీ గురుకుల పాఠశాలలు, రెసిడెన్షియల్ కాలేజీలకు భారీ కేటాయింపులు చేయగా, హాస్టల్స్ నిర్వహణ, విద్యార్థుల సంక్షేమంపై ప్రత్యేక దృష్టి పెట్టారు. ప్రీ-మాట్రిక్, పోస్ట్-మాట్రిక్ స్కాలర్షిప్స్ విస్తరణ ద్వారా పేద విద్యార్థులకు విద్యా అవకాశాలు మెరుగుపరచాలని ప్రభుత్వం భావిస్తోంది. అదేవిధంగా, బీసీ కార్పొరేషన్ ద్వారా రుణాలు, సబ్సిడీలు అందించి యువతను స్వయం ఉపాధి దిశగా ప్రోత్సహించనున్నారు.

చిన్న వ్యాపారాలు, వృత్తి ఆధారిత రంగాల్లో ఆర్థిక సహాయం అందించడంపై ప్రత్యేకంగా దృష్టి పెట్టారు. సంప్రదాయ వృత్తులు చేపట్టే కులాలకు మద్దతు, నైపుణ్యాభివృద్ధి శిక్షణల ద్వారా ఉద్యోగావకాశాలు పెంచడం కూడా బడ్జెట్లో ప్రధాన అంశాలుగా ఉన్నాయి. ఇక బీసీ భవనాలు, కమ్యూనిటీ హాల్స్ నిర్మాణం, మహిళా సంఘాలు, సహకార సంఘాలకు మద్దతు వంటి కార్యక్రమాలకు కూడా నిధులు కేటాయించారు.

ఈ చర్యల ద్వారా గ్రామీణ మరియు పట్టణ ప్రాంతాల్లో బీసీ వర్గాల సామాజిక- స్థితిని మెరుగుపరచాలని ప్రభుత్వం లక్ష్యంగా పెట్టుకుంది. అయితే, కేటాయింపులు పెరగడం ఒకవైపు ఉంటే, వాటి సమర్థ వినియోగం మరోవైపు కీలకమని నిపుణులు అభిప్రాయపడుతున్నారు. గతంలో కేటాయించిన నిధుల పూర్తిస్థాయి వినియోగంపై విమర్శలు వచ్చిన నేపథ్యంలో, ఈసారి అమలు విధానం, పారదర్శకత, లబ్ధిదారులకు నిధుల చేరికపై ప్రభుత్వం ప్రత్యేకంగా దృష్టి పెట్టాల్సిన అవసరం ఉందని విశ్లేషకులు సూచిస్తున్నారు.

రాజకీయంగా కూడా ఈ కేటాయింపులు ప్రాధాన్యం సంతరించుకున్నాయి. బీసీ వర్గాల ప్రాతినిధ్యం, సంక్షేమంపై చర్చలు వేడెక్కుతున్న తరుణంలో, ఈ పెంపు ప్రభుత్వానికి మద్దతు పెంచే అంశంగా మారవచ్చని భావిస్తున్నారు. అదే సమయంలో, ప్రతిపక్షాలు మాత్రం కేటాయింపులు మాత్రమే కాకుండా అమలు కీలకమని విమర్శలు గుప్పించే అవకాశం ఉంది. బీసీ సంక్షేమానికి పెరిగిన నిధులు ప్రభుత్వం సామాజిక న్యాయానికి కట్టుబడి ఉందనే సంకేతాలు ఇస్తున్నప్పటికీ, ఈ భారీ కేటాయింపులు క్షేత్రస్థాయిలో ఎంతవరకు ఫలితాలిస్తాయన్నది చూడాల్సిందే.