న్యూఢిల్లీ: భారత్-బంగ్లాదేశ్ సరిహద్దులో ప్రస్తుత పరిస్థితిని పర్యవేక్షించేందుకు కేంద్రప్రభుత్వం శుక్రవారం ఒక ప్యానెల్‌ను ఏర్పాటు చేసినట్లు కేంద్ర హోంమంత్రి అమిత్ షా తెలిపారు. బంగ్లా అధికారులతో కమిటీ సంప్రదింపులు జరుపుతోందని అమిత్ షా పేర్కొన్నారు. “బంగ్లాదేశ్‌లో కొనసాగుతున్న పరిస్థితుల నేపథ్యంలో, ఇండో-బంగ్లాదేశ్ సరిహద్దు (ఐబిబి)లో ప్రస్తుత పరిస్థితులను పర్యవేక్షించడానికి మోడీ ప్రభుత్వం ఒక కమిటీని ఏర్పాటు చేసింది. బంగ్లాదేశ్‌లోని భారతీయ పౌరులు, హిందువులు ఇతర మైనారిటీ కమ్యూనిటీల భద్రతను నిర్ధారించడానికి ఈ కమిటీ బంగ్లాదేశ్‌లోని వారి అధికారులతో కమ్యూనికేషన్ ఛానెల్‌లను నిర్వహిస్తుంది, ”అని షా ఎక్స్ లో పోస్ట్ చేసారు.

కమిటీకి ఏడీజీ, సరిహద్దు భద్రతా దళం, తూర్పు కమాండ్ నేతృత్వం వహిస్తారని కేంద్ర హోంమంత్రి తెలిపారు. బంగ్లాదేశ్‌ ప్రధాని షేక్‌ హసీనా తన పదవికి రాజీనామా చేసి భారత్‌కు పారిపోవడంతో రాజకీయ సంక్షోభం నెలకొంది. దేశాన్ని పరిపాలించడానికి నోబెల్ గ్రహీత ముహమ్మద్ యూనస్ ఆధ్వర్యంలో తాత్కాలిక ప్రభుత్వం ఏర్పడింది. బంగ్లాదేశ్‌కు ఆనుకుని ఉన్న సరిహద్దుల్లో బోర్డర్ సెక్యూరిటీ ఫోర్స్ (బీఎస్‌ఎఫ్) నిఘా పెంచింది. బంగ్లాదేశ్‌లోని జైళ్ల నుంచి ఉగ్రవాదులతో సహా 1,200 మందికి పైగా ఖైదీలు తప్పించుకున్నారని, భారత్‌లోకి చొరబడేందుకు ప్రయత్నించవచ్చని భద్రతా సంస్థలు బీఎస్‌ఎఫ్ని హెచ్చరించాయి. 4,096 కి.మీ పొడవున్న భారత్-బంగ్లాదేశ్ అంతర్జాతీయ సరిహద్దు వెంబడి నివసిస్తున్న స్థానికులు రాత్రి సమయంలో సరిహద్దు ప్రాంతాల్లో అనవసర రాకపోకలకు పాల్పడవద్దని బీఎస్‌ఎఫ్ సూచించింది. సరిహద్దు వెంబడి ఉన్న దుకాణాలను రాత్రి 9 గంటలకు మూసివేయాలని కోరినట్లు అధికారులు హెచ్చరించారు.