న్యూఢిల్లీ: అమెరికా అధ్యక్షుడు డొనాల్డ్ ట్రంప్(US President Donald Trump) మాదిరిగానే చైనా కూడా దూత అవతారం ఎత్తింది. భారత్-పాకిస్థాన్ ఘర్షణల పరిష్కారానికి మధ్యవర్తిత్వం వహించినట్లు చైనా వెల్లడించింది. అనేక ప్రపంచ ఘర్షణల పరిష్కారానికి మధ్యవర్తిత్వం వహించామని వాంగ్ యూ పేర్కొన్నారు. చైనా ప్రచారాన్ని భారత విదేశాంగశాఖ ఉన్నతాధికారులు ఖండించారు. భారత్-పాక్ యుద్ధ(India-Pakistan War) విరమణలో మూడో పక్షం జోక్యం లేదని స్పష్టం చేశారు. భారత్-పాక్ అంశంలో చైనా ప్రకటన ఆందోళన కలిగిస్తోందని కాంగ్రెస్ పేర్కొంది. చైనా ప్రకటన దేశ భద్రతను అపహాస్యం చేసేలా ఉందని కాంగ్రెస్ వెల్లడించింది. ప్రధాని నరేంద్ర మోదీ(Prime Minister Narendra Modi) మౌనం వీడి దేశ ప్రజలకు స్పష్టత ఇవ్వాలని కాంగ్రెస్ డిమాండ్ చేసింది.

భారత్-పాకిస్తాన్ మధ్య మధ్యవర్తిత్వం గురించి చైనా వాదనలను కాంగ్రెస్ పార్టీ ఆందోళనకరంగా పేర్కొంది. భారత ప్రజలకు ఈ అంశంపై స్పష్టత అవసరమని పేర్కొంది. కాంగ్రెస్ ప్రధాన కార్యదర్శి జైరాం రమేష్, దేశ జాతీయ భద్రతను అపహాస్యం చేసేలా ఉన్న ఈ ఆరోపణపై ప్రధానమంత్రి నరేంద్ర మోదీ తన మౌనాన్ని వీడాలని కోరారు. మే 10, 2025న ఆపరేషన్ సిందూర్‌ను ఆపడానికి తాను వ్యక్తిగతంగా జోక్యం చేసుకున్నానని అధ్యక్షుడు ట్రంప్ చాలా కాలంగా చెబుతున్నారు. కనీసం ఏడు వేర్వేరు దేశాలలో, వివిధ వేదికలపై ఆయన 65 వేర్వేరు సందర్భాలలో ఈ విషయాన్ని చెప్పారు. తన స్నేహితుడని చెప్పుకునే వ్యక్తి చేసిన ఈ వాదనలపై ప్రధానమంత్రి ఇప్పటివరకు మౌనం వీడలేదు," అని జైరాం రమేష్ ఎక్స్‌లో ఒక పోస్ట్‌లో పేర్కొన్నారు. 

ఇప్పుడు చైనా విదేశాంగ మంత్రి కూడా ఇలాంటి వాదననే చేస్తూ, చైనా కూడా మధ్యవర్తిత్వం వహించిందని అంటున్నారు. జూలై 4, 2025న, ఆర్మీ డిప్యూటీ చీఫ్ ఆఫ్ స్టాఫ్ లెఫ్టినెంట్ జనరల్ రాహుల్ సింగ్ బహిరంగంగా మాట్లాడుతూ... ఆపరేషన్ సిందూర్ సమయంలో భారత్ వాస్తవానికి చైనాను ఎదుర్కొంటూ, దానితో పోరాడుతోందని పేర్కొన్నారు. చైనా పాకిస్థాన్‌కు స్పష్టంగా మద్దతు ఇస్తున్న నేపథ్యంలో, భారత్, పాకిస్థాన్‌ల మధ్య తాము మధ్యవర్తిత్వం వహించామని చైనా చేస్తున్న వాదనలు ఆందోళన కలిగిస్తున్నాయి. ఇది కేవలం మన దేశ ప్రజలు నమ్మేలా చేసిన విషయాలకు నేరుగా విరుద్ధంగా ఉండటమే కాకుండా, ఇది మన జాతీయ భద్రతనే ఒక అపహాస్యం చేస్తున్నట్లు కనిపిస్తోందన్నారు.