హైదరాబాద్: మార్కాపురం జిల్లా(Markapuram Bus Accident) బ‌స్సు ప్ర‌మాద ఘ‌ట‌న‌ ముఖ్యమంత్రి రేవంత్ రెడ్డి(CM Revanth Reddy) తీవ్ర దిగ్భ్రాంతి వ్యక్తం చేశారు. ఈ ఘ‌ట‌న‌లో ప‌లువురు మృతి చెందారన్న వార్త తీవ్ర ఆవేదన కలిగించిందని తెలిపారు. మృతుల కుటుంబాలకు సీఎం రేవంత్ ప్రగాఢ సానుభూతి తెలిపారు. గాయ‌ప‌డిన వారి మెరుగైన వైద్య సహాయం అందించడానికి ఏపీ ప్రభుత్వ అధికారులతో సమన్వయం చేసుకుంటున్నామని పేర్కొన్నారు. తెలంగాణ రాష్ట్రం లోని నిర్మ‌ల్‌ నుంచి ఆంధ్రప్రదేశ్ లోని నెల్లూరు వైపు వెళుతున్న ఈ బ‌స్సు ప్ర‌మాదంలో మృతులతో పాటు గాయ‌ప‌డిన వారి వివ‌రాలు తెలుసుకుని, ఆంధ్ర ప్రదేశ్ అధికారులతో సమన్వయం చేసుకుని యుద్ధ ప్రాతిపదికన సహాయక చర్యలు తీసుకోవాలని ప్రభుత్వ ప్రధాన కార్యదర్శి శ్రీ రామకృష్ణారావును ముఖ్యంత్రి ఆదేశించారు.

ఆంధ్రప్రదేశ్‌లోని మార్కాపురం జిల్లా రాయవరం సమీపంలో గురువారం తెల్లవారుజామున జరిగిన ఒక ఘోర రోడ్డు ప్రమాదంలో 14 మంది ప్రాణాలు కోల్పోయారు. జగిత్యాల నుండి వింజమూరుకు వెళ్తున్న ఒక ప్రైవేట్ ట్రావెల్ బస్సు, స్థానిక స్లేట్ గనుల వద్ద వేగంగా దూసుకొస్తున్న ఒక టిప్పర్ ట్రక్కును ఢీకొనడంతో ఈ విషాదం చోటుచేసుకుంది. ప్రాథమిక పోలీసు నివేదికల ప్రకారం, ఢీకొన్న తీవ్రత వల్ల బస్సులోని డీజిల్ ట్యాంకు పేలిపోయి, వాహనం తక్షణమే మంటల్లో చిక్కుకుంది. ఈ ప్రమాదం జరిగినప్పుడు ప్రయాణికులలో అత్యధికులు గాఢ నిద్రలో ఉన్నారు. ప్రమాద తీవ్రతకు బస్సు తలుపులు జామ్ అవ్వడంతో, ఆ వాహనం మంటల గోళంగా మారడంతో లోపల ఉన్నవారు అందులోనే చిక్కుకుపోయారు. సహాయం కోసం వారు ఎంతగా ఆర్తనాదాలు చేసినప్పటికీ, తప్పించుకునేలోపే ప్రయాణికులు సజీవ దహనం అయ్యారు.