బులంద్‌షహర్: ఉత్తర్ ప్రదేశ్(Uttar Pradesh) లోని బులంద్‌షహర్‌లోని జాతీయ రహదారి 34పై భక్తులతో నిండిన ట్రాక్టర్‌ను కంటైనర్ ఢీకొట్టడంతో 8 మంది మృతి చెందగా, 45 మంది గాయపడ్డారు. యుపిలోని కాస్‌గంజ్ నుండి రాజస్థాన్‌లోని గోగమేడికి గోగాజీ భక్తులు(Gogaji devotees) వెళుతుండగా ఘటల్ గ్రామం సమీపంలో ఈ సంఘటన జరిగింది. బాధితుల్లో 12 మంది పిల్లలు ఉన్నారు. సమాచారం అందిన వెంటనే జిల్లా మేజిస్ట్రేట్, ఎస్ఎస్పీతో సహా పోలీసు బృందాలు ప్రమాద స్థలానికి చేరుకున్నాయి. గాయపడిన వారిని అలీఘర్ మెడికల్ కాలేజీ, బులంద్‌షహర్ జిల్లా ఆసుపత్రి, కైలాష్ ఆసుపత్రిలో చేర్చారు. ముగ్గురి పరిస్థితి విషమంగా ఉంది. వారు వెంటిలేటర్ సహాయంతో చికిత్స పొందుతున్నారు. ఈ సంఘటన గురించి సమాచారం అందిన వెంటనే, ఆర్నియా పోలీసులు, సమీపంలోని పోలీస్ స్టేషన్ దళాలు వెంటనే సంఘటనా స్థలానికి చేరుకున్నాయని అదికారులు పేర్కొన్నారు.

ప్రమాదానికి కారణమైన కంటైనర్‌ను కూడా పోలీసులు స్వాధీనం చేసుకున్నారు. "అలీఘర్ సరిహద్దులోని NH 34లో సోమవారం తెల్లవారుజామున ఒక దురదృష్టకర సంఘటన జరిగింది. కాస్‌గంజ్ జిల్లా నుండి రాజస్థాన్‌కు ట్రాక్టర్‌లో దాదాపు 60-61 మంది ప్రయాణిస్తున్నారు. వెనుక నుండి వస్తున్న కంటైనర్ అతి వేగంగా దానిని ఢీకొట్టడంతో ట్రాక్టర్ బోల్తా పడి పెద్ద సంఖ్యలో ప్రజలు గాయపడ్డారు. 8 మంది మరణించారు. ప్రస్తుతం 45 మంది చికిత్స పొందుతున్నారు. 3 మంది తప్ప మిగతా వారందరి పరిస్థితి బాగానే ఉందని నివేదించబడింది. ఆ ముగ్గురిని ప్రస్తుతం వెంటిలేటర్‌పై ఉంచారు. ట్రాక్టర్‌ను సంఘటన స్థలం నుండి తొలగించారు. ప్రమాదానికి కారణమైన ట్రక్కు పోలీసుల అదుపులో ఉంది" అని బులంద్‌షహర్ ఎస్ఎస్పీ దినేష్ కుమార్ సింగ్ మీడియాతో మాట్లాడుతూ అన్నారు. మృతులను ట్రాక్టర్ డ్రైవర్ ఇ.యు. బాబు (40), రాంబేటి (65), చాందిని (12), ఘనిరామ్ (40), మోక్షి (40), శివాంశ్ (6), యోగేష్ (50), వినోద్ (45)గా గుర్తించారు. వీరందరూ కాస్గంజ్ జిల్లాకు చెందినవారని పోలీసులు తెలిపారు. ఈ ఘటనపై కేసు నమోదు  చేసుకుని మృతదేహాలను పోస్ట్‌మార్టం కోసం మార్చురీకి తరలించినట్లు పోలీసులు పేర్కొన్నారు.