కోల్‌కతా: పశ్చిమ బెంగాల్‌లోని ముర్షిదాబాద్ జిల్లాలోని టీఎంసీ ఎమ్మెల్యే జిబన్ కృష్ణ సాహా(TMC MLA Jiban Krishna Saha) నివాసంలో పాఠశాల ఉపాధ్యాయుల నియామకంలో జరిగిన అవకతవకలపై దర్యాప్తుకు సంబంధించి ఎన్‌ఫోర్స్‌మెంట్ డైరెక్టరేట్ (Enforcement Directorate ) సోమవారం దాడులు నిర్వహిస్తున్నట్లు సీనియర్ అధికారి తెలిపారు. దాడి గురించి శాసనసభ్యుడికి తెలియగానే, అతను ఆవరణలోని సరిహద్దు గోడను దూకి తన ఇంటి నుండి పారిపోవడానికి ప్రయత్నించాడని ఆయన పేర్కొన్నారు. ఆ ఎమ్మెల్యేను మా అధికారులు సమీప ప్రాంతంలో వెంబడించి పట్టుకున్నారు. ఇప్పుడు, మా అధికారులు అతన్ని విచారిస్తున్నారని ఈడీ అధికారి మీడియాకి తెలిపారు.

పాఠశాల ఉపాధ్యాయుల నియామక కుంభకోణానికి సంబంధించి బీర్భూమ్ జిల్లాకు చెందిన ఒక వ్యక్తి చేసిన నగదు లావాదేవీకి సంబంధించిన సమాచారం ఆధారంగా ఈ దాడులు నిర్వహించినట్లు అధికారులు తెలిపారు. "బీర్భూమ్ జిల్లాకు చెందిన వ్యక్తి ఈ ఉదయం ఈడీ బృందంతో పాటు సాహా ఇంటికి వెళ్ళాడు" అని అధికారి తెలిపారు. ఈ కుంభకోణానికి సంబంధించి కేంద్ర దర్యాప్తు సంస్థ గతంలో సాహా భార్యను ప్రశ్నించింది. స్కూల్ రిక్రూట్‌మెంట్ స్కామ్‌కు సంబంధించి సీబీఐ 2023 ఏప్రిల్‌లో సాహాను అరెస్టు చేసింది. ఈ ఏడాది మేలో అతను బెయిల్‌పై విడుదలయ్యాడు. ఈ కుంభకోణంలో మనీలాండరింగ్ అంశాన్ని ఎన్‌ఫోర్స్‌మెంట్ డైరెక్టరేట్ దర్యాప్తు చేస్తుండగా, దానితో ఉన్న నేర సంబంధాలపై సీబీఐ దర్యాప్తు చేస్తోంది.