నార్సింగి: హైదరాబాద్ నగర శివార్లలోని నార్సింగి పోలీస్ స్టేషన్ పరిధి(Narsingi Police Station)లోని ఓం కన్వెన్షన్ సమీపంలోని కార్మిక శిబిరంలో మంగళవారం జరిగిన అగ్నిప్రమాదంలో కనీసం నాలుగు తాత్కాలిక ఇళ్ళు దెబ్బతిన్నాయి.ఈ అగ్నిప్రమాదంలో ఎటువంటి ప్రాణనష్టం జరగలేదని అధికారులు వెల్లడించారు. షార్ట్ సర్క్యూట్, తరువాత ఎల్పిజి లీకేజీ(LPG leakage) కారణంగా మంటలు సంభవించాయని అనుమానిస్తున్నారు. అయితే, అధికారులు దానిని నిర్ధారించాల్సి ఉంది. అందుబాటులో ఉన్న సమాచారం ప్రకారం, ఒక ఇంట్లో మంటలు చెలరేగడంతో ఈ సంఘటన జరిగింది.

క్షణాల్లోనే మంటలు ఇతర ఇళ్లకు వ్యాపించాయి. దీంతో అప్రమత్తమైన చుట్టు పక్కన ఉన్న ఇళ్లలోని నివాసితులు సురక్షిత ప్రాంతాలకు పరుగులు తీశారు. ఈ సంఘటన సమీపం ప్రజల్లో భయాందోళనలను సృష్టించింది. సమీప నివాస ప్రాంతంలోని స్థానికులు మంటలు, తాత్కాలిక ఇళ్ళ నుండి వెలువడుతున్న దట్టమైన పొగను గమనించి అగ్నిమాపక శాఖ, పోలీసులకు సమాచారం అందించారు. హుటాహుటిన ఘటనాస్థలికి చేరుకున్న పోలీసులు, అగ్నిమాపక సిబ్బంది మంటలను ఆర్పారు. ఇళ్లలో గడ్డి, ప్లాస్టిక్ పదార్థాలు ఉండటం వల్ల చుట్టుపక్కల చెడు వాసనతో పాటు దట్టమైన పొగ వ్యాపించింది. దెబ్బతిన్న ఆస్తి మొత్తం విలువ ఇంకా అంచనా వేయబడలేదు. ఈ ఘటనపై కేసు నమోదు చేసుకున్న నార్సింగి పోలీసులు దర్యాప్తు చేస్తున్నారు. ఈనెల 18 వ తేదీన చార్మినార్ పరిసర ప్రాంతాల్లోని గుల్జారి హౌజ్ వద్ద భారీ అగ్ని ప్రమాదం సంభవించిన విషయం తెలిసిందే.