సమస్యలకు ఆత్మహత్యలు పరిష్కారం కాదు: RTC డ్రైవర్ శంకర్ గౌడ్ మృతి పట్ల మహేష్ గౌడ్ దిగ్భ్రాంతి

హైదరాబాద్: వరంగల్ జిల్లా నర్సంపేట డిపో డ్రైవర్ శంకర్ గౌడ్(Narsampet RTC Bus Driver) మృతి పట్ల టీ పీసీసీ అధ్యక్షుడు మహేశ్ కుమార్ గౌడ్ దిగ్భ్రాంతి వ్యక్తం చేశారు. శంకర్ గౌడ్ బలవన్మరణం అత్యంత బాధాకరం అన్నారు. సమస్యలకు ఆత్మహత్యలు పరిష్కారం కాదు.. చర్చల ద్వారా పరిష్కరించుకోవాలని మహేశ్ గౌడ్ సూచించారు. ఇది ప్రజా ప్రభుత్వం.. ప్రజా సమస్యల పరిష్కారానికి నిత్య కృషిచేస్తోందని వివరించారు.

''నర్సంపేట డిపో డ్రైవర్ శంకర్ గౌడ్ గారి విషాద మరణం పట్ల తీవ్రంగా విచారిస్తున్నాను. ఆయన అకాల మరణం హృదయ విదారకం. వారి కుటుంబానికి నా ప్రగాఢ సానుభూతి. ఆయన ఆత్మకు శాంతి చేకూరాలని ప్రార్థిస్తున్నాను.'' అంటూ మహేశ్ గౌడ్ ఎక్స్ లో పోస్టు చేశారు. వరంగల్‌లోని నర్సంపేట బస్టాండ్‌లో(Narsampet Bus Stand) గురువారం ఆత్మహత్యకు యత్నించిన నర్సంపేట ఆర్టీసీ డిపో బస్సు డ్రైవర్ కె. శంకర్ గౌడ్, శుక్రవారం తెల్లవారుజామున కాంచన్‌బాగ్‌లోని ఒక ప్రైవేట్ ఆసుపత్రిలో చికిత్స పొందుతూ తీవ్రమైన కాలిన గాయాల కారణంగా మరణించారని వైద్యులు తెలిపారు. శంకర్ గౌడ్ తెల్లవారుజామున 2:30 గంటలకు మరణించినట్లు పోలీసులు ధృవీకరించారు. ఉస్మానియా జనరల్ ఆసుపత్రికి(Osmania General Hospital) చెందిన ఫోరెన్సిక్ వైద్యుల పర్యవేక్షణలో శవపరీక్ష నిర్వహించిన అనంతరం, మృతదేహాన్ని కుటుంబ సభ్యులకు అప్పగించినట్లు వారు తెలిపారు. శవపరీక్ష పూర్తయ్యాక, మృతదేహాన్ని నర్సంపేట మండలం, ముతోజిపేట గ్రామంలోని గౌడ్ స్వగ్రామానికి తరలించారు.