మాజీ మంత్రి హరీష్ రావు 

నారాయణఖేడ్, నవంబర్ 30: నారాయణఖేడ్, జహీరాబాద్ నియోజకవర్గాలకు సంబంధించి తాము చేపట్టిన బసవేశ్వర, సంగమేశ్వర ప్రాజెక్టులను పనులు చేపట్టకపోతే బిఆర్‌ఎస్ పార్టీ ఆధ్వర్యంలో పెద్ద ఎత్తున ఉద్యమాన్ని చేపడుతామని మాజీ మంత్రి హరీష్ రావు అన్నారు. ఆదివారం నారాయణఖేడ్ కు వచ్చిన సందర్భంగా స్థానిక విలేకరులతో మాట్లాడారు. నారాయణఖేడ్ నియోజకవర్గ అభివృద్ధికి తమ హయాంలో పెద్ద ఎత్తున అభివృద్ధి పనులు చేపట్టడం జరిగిందన్నారు.

నారాయణఖేడ్ ప్రాంతాన్ని సస్యశ్యామలం చేసేందుకు మాజీ ముఖ్యమంత్రి కేసీఆర్ చేతుల మీదుగా సంబంధిత ప్రాజెక్టులను శంకుస్థాపన చేపట్టి పనులను ప్రారంభించిన ఇప్పటి కాంగ్రెస్ ప్రభుత్వం వాటిని పట్టించుకోవడం లేదని ఆరోపించారు. రైతులకు సంబంధించి యాసంగి బోనస్ డబ్బులు 1150 కోట్లు విడుదల చేయలేదని ఆరోపించారు. రైతులకు రైతుబంధు ఇవ్వకుండా కాంగ్రెస్ ప్రభుత్వం మోసం చేస్తుందని ఆరోపించారు. ఎన్నికల్లో ఏడాదికి మూడుసార్లు రైతుబంధు ఇస్తామని హామీ ఇచ్చి సంవత్సరానికి ఒకసారి సైతం సక్రమంగా ఇవ్వడం లేదని ఆరోపించారు.

కొనుగోలు కేంద్రాలను నిర్వీర్యం చేస్తూ రైతులను ఇబ్బంది పెట్టడం సరికాదన్నారు. తమ ప్రభుత్వం గతంలో పండుగలకు చీరలను పంపిణీ చేస్తే కాంగ్రెస్ ప్రభుత్వం ఓట్ల కోసం చీరలను పంపిణీ చేస్తుందని ఆరోపించారు. స్థానిక సంస్థల ఎన్నికల్లో కాంగ్రెస్ ప్రభుత్వానికి ప్రజలు బుద్ధి చెప్పాలని సూచించారు. కార్యక్రమంలో మాజీ ఎమ్మెల్యే ఎం భూపాల్ రెడ్డి. మొహీద్ ఖాన్, రాష్ట్ర గిడ్డంగుల మాజీ చైర్మన్ బిక్షపతి, రవీందర్ నాయక్, నజీబ్, పరమేశ్వర్, నగేష్ సెట్, ర్యకాల గోపాల్, మల్ ల్గొండ, తదితరులు పాల్గొన్నారు.