ఎల్బీనగర్ ఎమ్మెల్యే సుధీర్ రెడ్డి 

ఎల్బీనగర్, నవంబర్ 30 : నాగోల్, మన్సూరాబాద్ డివిజన్ల పరిధిలోని పది కాలనీల ప్రజలు స్థానికంగా ఉన్న డంపింగ్ యార్డ్, పారిశ్రామిక వ్యర్థ జలాలతో తీవ్ర ఇబ్బందులు పడుతున్నారు. విషయం తెలుసుకున్న ఎమ్మెల్యే సుధీర్ రెడ్డి ఆదివారం నాగోల్ డివిజన్ పరిధిలోని పది కాలనీల జాయింట్ యాక్షన్ కమిటీ సభ్యులతో సెవెన్ హిల్స్ కాలనీలో ప్రత్యేకంగా సమావేశం నిర్వహించారు. సమావేశంలో సెవెన్ హిల్స్ కాలనీ, స్వాతి గార్డెన్స్, ద్వారక నగర్, డీపీ నగర్, హిమపురి కాలనీ 1, 2, సౌత్ ఎండ్ పార్క్, సహారా, జడ్జెస్ కాలనీ, చండీశ్వర్ కాలనీ, ప్రెస్ కాలనీల ప్రతినిధులు పాల్గొన్నారు.

ఈ సందర్భంగా కాలనీవాసులు మాట్లాడుతూ... పక్కన ఉన్న డంపింగ్ యార్డు దుర్వాసనతో చర్మ, శ్వాసకోశ సమస్యలు  వ్యాప్తి చెందుతున్నాయని తెలిపారు. రాత్రిపూట రహస్యంగా కెమికల్ వ్యర్థాలను నాలాలో చేరుస్తున్నవారిపై కఠిన చర్యలు తీసుకోవాలని కోరారు. అనంతరం సుధీర్ రెడ్డి మాట్లాడుతూ... గతంలో డంపింగ్ యార్డు ప్రాంతంలో అధికారులతో కలిసి పర్యటించి, పరిసర కాలనీల్లో సీసీ కెమెరాలు ఏర్పాటు చేయించామని తెలిపారు. 

ప్రస్తుతం అక్కడ సీసీ కెమెరాలు పనిచేయడం లేదన్నారు. మళ్లీ అధికారులతో చర్చించి మరోసారి పర్యటించి, వ్యర్థ జలాలను మోటర్ల ద్వారా తొలిగిస్తామని హామీ ఇచ్చారు. ఓపెన్ డ్రైన్స్ నిర్మాణ పనులకు దాదాపు ఏడు కోట్ల యాబై లక్షల రూపాయలు మంజూరు చేశానని గుర్తు చేశారు. డ్రైనేజీ పనులు సకాలంలో పూర్తయితే చుట్టుపక్కల కాలనీవాసులకు దుర్గంధం నుంచి పూర్తి స్థాయిలో విముక్తి లభిస్తుందన్నారు.

కార్యక్రమంలో మన్సూరాబాద్ డివిజన్ మాజీ కార్పొరేటర్ కొప్పుల విఠల్ రెడ్డి, బీఆర్‌ఎస్ నాయకులు ఆనంతుల రాజిరెడ్డి, జగదీశ్ యాదవ్, సతీశ్ యాదవ్, జేఏసీ అధ్యక్షుడు కత్తుల రాంబాబు, నాయకులు రమేష్, చంద్రారెడ్డి, అంజయ్య, జనార్ధన్, భిక్షం, యాదగిరి, రాజేశ్, మధుసూదన్ రెడ్డి, రవికిరణ్ చారి, గోపికృష్ణారెడ్డి తదితరులు పాల్గొన్నారు.