నాథన్ ఎల్లిస్ సంచలన స్పెల్

ఐర్లాండ్‌పై ఆస్ట్రేలియా ఘనవిజయం

కొలంబో, ఫిబ్రవరి 11 : టీ20 ప్రపంచకప్ లో అందరికంటే ఆలస్యంగా  మొదటి మ్యాచ్ ఆడిన ఆస్ట్రేలియా తమ టైటిల్ వేటను ఘనంగా ఆరంభించింది. తొలి మ్యాచ్‌లో ఐర్లాండ్ పై 67 పరుగుల తేడాతో ఘనవిజయం సాధించింది. బ్యాటింగ్ లో ఇంగ్లీస్ , రెన్షా , స్టోయినిస్ మెరుపులు.. బౌలింగ్‌లో నాథన్ ఎల్లిస్ సంచలన స్పెల్, ఆడమ్ జంపా స్పిన్ మ్యాజిక్ ఆసీస్‌కు అద్భుత విజయాన్ని అందించాయి. మొదట బ్యాటింగ్‌కు దిగిన ఆస్ట్రేలియా 20 ఓవర్లలో 6 వికెట్లకు 182 పరుగులు చేసింది. ట్రావిస్ హెడ్, మాక్స్ వెల్ నిరాశపరిచినా మిగిలిన బ్యాటర్లు రాణించారు.

స్టోయినిస్ 45, ఇంగ్లీస్ 37,రెన్షా 37 పరుగులు చేశారు. ఐర్లాండ్ బౌలర్లు చివర్లో కట్టుదిట్టంగా బౌలింగ్ చేయడంతో ఆసీస్ స్కోరు 200 లోపే పరిమితమైంది. ఛేజింగ్‌లో ఐర్లాండ్ ను ఆసీస్ బౌలర్లు కంగారెత్తించారు. నాథన్ ఎల్లిస్ అద్భుతమైన పేస్ బౌలింగ్‌తో చెలరేగిపోయాడు. ఫలితంగా ఐర్లాండ్ కేవలం 49 పరుగులకే సగం వికెట్లు కోల్పోయింది. జార్జ్ టాక్రెల్ 41, కీపర్ టక్కర్ 24 తప్పిస్తే మిగిలిన వారంతా చేతులెత్తేశారు.

వీరిద్దరూ పోరాడడంతో ఐర్లాండ్ స్కోరు కనీసం 100 పరుగులు దాటగలిగింది.నాథన్ ఎల్లిస్ కేవలం 3.5 ఓవర్లలో 12 పరుగులు ఇచ్చి 4 వికెట్లు తీశాడు. అలాగే స్పిన్నర్ ఆడమ్ జంపా 4 వికెట్లు పడగొట్టాడు. దీంతో ఐర్లాండ్ 115 పరుగులకే ఆలౌటైంది. టీ ట్వంటీ ప్రపంచకప్‌లో 4 వికెట్ల అత్యుత్తమ ప్రదర్శన కనబరిచిన ఐదో బౌలర్‌గా నాథన్ ఎల్లిస్ రికార్డులకెక్కాడు.