1. తెలంగాణకిచ్చే నిధుల్లో కేంద్రం ఉదారత చూపాలి
2. రాష్ట్రానికి ప్రత్యేక గ్రాంట్లను విడుదల చేయాలి 
3. చిన్న పంచాయతీలకు నిధులిచ్చి ఆదుకోవాలి 
4. నాన్ ట్యాక్స్ రెవెన్యూలో రాష్ట్రాలకూ వాటా ఇవ్వాలి 
5. ఇరిగేషన్ ప్రాజెక్టులకు కేంద్రం సాయం అవసరం 
6. వెనుకబడిన ప్రాంతాలకు ప్రత్యేక గ్రాంట్లు ఇవ్వాలి 
7. 16వ ఆర్థిక సంఘానికి రాజకీయ పార్టీలు,  స్టేట్ ఫైనాన్స్ కమిషన్ సిఫార్సులు 
8. నేడూ కొనసాగనున్న కేంద్ర ఫైనాన్స్ కమిషన్ సమావేశాలు

హైదరాబాద్, సెప్టెంబర్ 9 (విజయక్రాంతి): రాష్ట్రానికి వచ్చే కేంద్ర నిధుల్లో కోత లేకుండా కేంద్ర ప్రభుత్వానికి సూచనలు చేయాలని 16వ ఆర్థిక సంఘానికి పంచాయతీ, మున్సిపాలిటీ పాలకవర్గాలు, రాజకీయ పార్టీలు, వ్యాపార వాణిజ్య సంస్థల ప్రతినిధులు సిఫార్సు చేశారు. రాష్ట్రంతో సంబంధం లేకుండా కేంద్రం నిధులను విడుదల చేయాలని సూచించారు. స్థానిక సంస్థల బలోపేతానికి కేంద్రం సాయం అనివార్యమని స్పష్టంచేశారు. గ్రామా లు, పట్టణాల అభివృద్ధికి నిధులు ఇచ్చే విషయంలో రాజకీయాలను పక్కనపెట్టి కేంద్రం ఉదారతను చాటుకో వాలని కోరారు. 16వ ఆర్థిక సంఘం చైర్మన్ బనగారియా నేతృత్వంలోని ఐదుగురు సభ్యుల బృందం సోమవారం ప్రజాభవన్‌లో ఆయా వర్గాలతో విస్తృత స్థాయిలో సమావేశమైంది.

తొలుత మున్సిపల్ కార్పొరేషన్లు, మున్సిపాలిటీల మేయర్లు, చైర్మన్లతో అజయ్ నారాయణ్, జార్జ్, మాథ్యూ, మనోజ్ పాండా, సౌమ్య కాంతిఘోష్, రిత్విక్ పాండేతో కూడిన కమిషన్ బృందం భేటీ అయ్యింది. ఆ తర్వాత రాష్ర్ట ఆర్థిక సంఘం చైర్మన్ సిరిసిల్ల రాజయ్య, సంఘ సభ్యులు, అధికారులు, గ్రామపంచాయతీల మాజీ సర్పంచులు, జడ్పీటీసీలు, ఎంపీపీలతో, అనంతరం వాణిజ్య సంస్థలైన అలీఫ్, ఫిక్కీ, సీఐఐ ప్రతినిధులతో సమావేశమైంది.

ఈ సందర్భంగా పార్టీలు, ప్రజాప్రతినిధులు, ఇతర ప్రతినిధులు ఫైనాన్స్ కమిషన్‌కు పలు సూచనలు చేశారు. జీడీపీలో అత్యత్తమ ప్రదర్శన కనబరుస్తున్న తెలంగాణకు ప్రత్యేక ప్రోత్సాహకాన్ని ఇవ్వాలని కోరారు. గ్రామీణ ఆరోగ్యాన్ని మెరుగుపర్చేందుకు పీహెచ్‌సీల్లో సౌకర్యాలను కల్పించేందుకు నిధులు కేటాయించేలా చూడాలని విజ్ఞప్తి చేశారు. 

తెలంగాణ ఆర్థిక సంఘం చేసిన సిఫార్సులు ఇవే..

నీతి ఆయోగ్ చేసిన సూచనలను అమలు చేయాలని 16 ఆర్థిక సంఘానికి సూచనలు చేసినట్టు రాష్ర్ట ఆర్థిక సంఘం చైర్మన్ సిరిసిల్ల రాజయ్య తెలిపారు. తెలంగాణకు రావాల్సిన 41 శాతం నిధుల వాటాలో కేవలం 31శాతం మాత్రమే వస్తుందని, దీన్ని పూర్తిస్థాయిలో రాష్ట్రానికే వచ్చేలా కేంద్రానికి సూచనలు చేయాలని విజ్ఞప్తి చేసినట్టు వెల్లడించారు. రాష్ట్ర ఆర్థిక సంఘం చేసిన మరికొన్ని సూచనలు ఇవి.. 

1. విభజన చట్టంలో పేర్కొన్న అంశాల ఆధారంగా నిధుల కేటాయింపు ఉండాలి.
2. నిధుల కేటాయింపులో నాన్ బీజేపీ పాలిత రాష్ట్రాలకు అన్యాయం చేయొద్దు.
3. జనాభా ఆధారంగా నిధులను ఇవ్వడం వల్ల తెలంగాణకు అన్యాయం జరుగుతుంది. జనాభాను నియంత్రించిన రాష్ట్రానికి మరింత ప్రయోజనాలు జరిగేలా నిధులు విడుదల చేయాలి.
4. చిన్న పంచాయతీలకు స్పెషల్ నిధులు ఇచ్చి ఆదుకోవాలని సిఫార్సులు
5. కేంద్రం ఇచ్చే నిధులను వినియోగించుకోడవంలో పంచాయతీలకు పూర్తి అధికారాలు ఇవ్వాలి.
6. ఉత్తమ పనితీరును కనబర్చిన రాష్ట్రాలకు పెర్మార్మెన్స్ బోనస్ ఇవ్వాలి.  
7. ఇరిగేషన్ ప్రాజెక్టులకు కేంద్రం సాయం చేయాలి.
8. పంచాయతీలకు ఇచ్చే నిధులను పెంచాలి.

స్థానిక సంస్థల గ్రాంట్‌ను 50 శాతానికి పెంచాలి: బీఆర్‌ఎస్

స్థానిక సంస్థలకు ఇచ్చే గ్రాంట్‌ను 50 శాతానికి పెంచాలని ఆర్థిక సంఘానికి బీఆర్‌ఎస్ విజ్ఞప్తి చేసింది. కేంద్రానికి వచ్చే ఆదాయంలో 20 శాతాన్ని సర్‌ఛార్జీలు, సెస్సుల రూపంలో సమకూర్చుకుంటున్నారు. కానీ, అందులో వాటాను రాష్ట్రాలకు ఇవ్వడం లేదని వివరించింది. సర్‌ఛార్జీలు, సెస్సుల్లో రాష్ట్రాలకూ వాటా ఇవ్వాలని సూచించింది. బీఆర్‌ఎస్ చేసిన మరికొన్ని సూచనలు ఇలా ఉన్నాయి.

1. పన్నుల వాటా 41 శాతం పెంచామని చెప్పిన కేంద్రం.. ప్రస్తుతం 31 శాతం మాత్రమే ఇస్తుంది. దీన్ని పూర్తి స్థాయిలో ఇవ్వాలి.
2. నాన్ ట్యాక్స్ రెవెన్యూలో రాష్ట్రాలకు వాటా ఇవ్వాలి.
3. బాగా పనిచేస్తున్న రాష్ట్రాలకు తక్కువ నిధులు ఇవ్వడం అన్యాయం.
4. పన్నుల వసూళ్లో అగ్రస్థానంలో ఉన్న రాష్ట్రాలకు రెండున్నర శాతం వెయిటేజీ ఇస్తున్నారు. దాన్ని 10 శాతానికి పెంచాలి.
5. రాష్ట్రాల అప్పులను కేంద్రమే తీర్చే విధంగా సూచనలు చేయాలి.
6. లిఫ్ట్ ఇరిగేషన్ ప్రాజెక్టుల నిర్వహణకు కనీసం రూ.40 వేల కోట్ల రూపాయలు కేటాయించాలి.
7. పాలమూరు ఎత్తిపోతల పథకానికి జాతీయ ప్రాజెక్టు హోదా ఇవ్వాలి.

భేటీ అయిన నేతలు వీరే.. 

కేంద్ర ఫైనాన్స్ కమిషన్‌తో భేటీ అయిన రాజకీయ నేతల్లో కాంగ్రెస్ నుంచి సిరిసిల్ల రాజయ్య, టీ రామ్మోహన్‌రెడ్డి, బీజేపీ నుంచి ఈటల రాజేందర్, కాసం వెంకటేశ్వర్లు, ప్రకాశ్‌రెడ్డి, బీఆర్‌ఎస్ నుంచి తన్నీరు హరీశ్‌రావు, పల్లా రాజేశ్వర్‌రెడ్డి, వివేకానంద, సీపీఎం నుంచి నంద్యాల నరసింహారెడ్డి, టీడీపీ నుంచి సామా భూపాల్‌రెడ్డి, ఎన్ దుర్గాప్రసాద్, బీఎస్పీ నుంచి జనత్ కుమార్, బీ ఈశ్వర్, ఎంఐఎం నుంచి అక్బరుద్దీన్ ఒవైసీ, సయ్యద్ అమీన్ జాఫ్రీ, బలాల, ఆమ్ ఆద్మీ పార్టీ నుంచి సుధాకర్, బుర్ర రేణుగౌడ్, అబ్బాస్ అహ్మద్ తదితరులు ఉన్నారు.

ఎస్సీ, ఎస్టీ, ఓబీసీలకు  ప్రత్యేక గ్రాంట్లు: బీజేపీ

ఎస్సీ, ఎస్టీ, ఓబీసీలకు ప్రత్యేక గ్రాంట్లు ఉండేలా చూడాలని 16వ ఆర్థిక సంఘానికి బీజేపీ సూచించింది. ఆ పార్టీ చేసిన సూచనలు ఇలా.. 

1. విపత్తుల నిర్వహణ కోసం ప్రత్యేకంగా ఒక శాతం నిధులు కేటాయించాలి. ఈ నిధులు పక్కదారి పట్టకుండా పకడ్బందీగా విధివిధానాలను రూపొందించాలి.
2. పునరుద్పాక ఇంధన మౌలిక సదుపాయాలు, వాతావరణ మార్పుల దుష్పరిణాలను తగ్గించేందుకు మొత్తం నిధుల్లో ఒక శాతం కేటాయించాలి.
3. పేదరిక నిర్మూలన, ప్రాంతీయ అసమానతలు, వ్యవసాయం వంటి గ్రామీణాభివృద్ధి అంశాలకు అధిక ప్రాధాన్యత ఇవ్వాలి.
4. మంచిగా పనిచేసే రాష్ట్రాలకు అధికంగా నిధులు ఇవ్వాలి.
5. వెనుకబడిన ప్రాంతాలకు ప్రత్యేక గ్రాంట్లు ఇవ్వాలి.
6. నిధుల కేటాయింపులో జాప్యం జరగకుండా కలెక్టర్‌కు బాధ్యతలు అప్పగించాలి.
7. ఆర్థిక నిర్వహణ పాటించే రాష్ట్రాలకు పెర్ఫార్మెన్స్ గ్రాంట్లు ఇవ్వాలి