ప్రభుత్వానికి మహేశ్వరం భూ బాధితుల మొర 

ఖైరతాబాద్, నవంబర్ ౩౦ (విజయక్రాం తి): ప్రభుత్వం రియల్ ఎస్టేట్ బడా సంస్థల ఆగడాలను అరికట్టి తమకు న్యాయం చేయాలని మహేశ్వరం మండలం తిమ్మాపూర్ గ్రామానికి చెందిన భూ బాధిత కుటుంబ సభ్యులు ప్రభుత్వానికి మొరపెట్టుకున్నారు. ఈ మేరకు ఆదివారం  సోమాజిగూడ ప్రెస్ క్లబ్ లో ఏర్పాటుచేసిన విలేకరుల సమావేశం లో బాధితులు నరేష్, హరికృష్ణ శ్రీరాములు, శాంతమ్మ మహేందర్ లు న్యాయవాది అరుణ్ కుమార్ తో కలిసి మాట్లాడారు..

తమ తాత ఎల్లయ్య పేరున  మహేశ్వరం మండలం తిమ్మాపూర్ గ్రామంలోని సర్వే నెంబర్లు 371, 372,3 73 లలో 52 ఎకరాల స్థలం ఉందని అన్నారు. తాత ముత్తాతల నుంచి తమ ఆధీనంలో ఉన్న సదరు భూమిని ధరణి చేర్చకపోవడంతో బడా రియల్ ఎస్టేట్ సంస్థలు సదరు భూమిపై కన్నేసి  కబ్జాకు యత్తిస్తున్నాయని ఆవేదన వ్యక్తం చేశారు. ఇందుకు స్థానిక ప్రజా ప్రతినిధులు సైతం వత్తాసు పలుకుతుండడంతో  ఇబ్బందులకు గురి అవుతున్నామని తెలిపారు.

పోలీసులు, రెవె న్యూ యంత్రాంగం సైతం అక్రమార్కులకు అండగా నిలుస్తూ తమపై తప్పుడు కేసులు బనాయిస్తున్నారని కన్నీరు మున్నీరయ్యారు. ఆ భూమిలో వెంచర్లు ఏర్పాటు చేసి విక్రయాలకు ప్రయత్నిస్తున్నారని తెలిపారు. ఆ సంస్థల వద్ద కొనుగోలుకు ప్రయత్నిస్తే డబ్బులు పోగొట్టుకోవడంతోపాటు న్యాయపరమైన చిక్కులు ఎదుర్కోవాల్సి వస్తుందని తెలిపారు . తిమ్మాపూర్‌లో కొనుగోలు చేసేందుకు ప్రయత్ని స్తున్న వినియోగదారులు జాగ్రత్త పడాలని విజ్ఞప్తి చేశారు.