హైదరాబాద్: నూతన సంవత్సర వేడుకల(New Year celebrations) సందర్భంగా, నగరంలోని మూడు పోలీస్ కమిషనరేట్ల పరిధిలో పోలీసులు విస్తృతంగా డ్రంక్ అండ్ డ్రైవ్ తనిఖీలు(Drunk and Drive Cases) నిర్వహించి, పెద్ద సంఖ్యలో నిబంధనలు ఉల్లంఘించిన వారిపై కేసులు నమోదు చేశారు. మద్యం సేవించి వాహనాలు నడిపినందుకు 2,731 మందిపై పోలీసులు కేసులు నమోదు చేశారు. వీరిలో 1,198 మందిపై హైదరాబాద్ కమిషనరేట్ పరిధిలో, 928 మందిపై సైబరాబాద్‌లో, 605 మందిపై రాచకొండ కమిషనరేట్ పరిధిలో కేసులు నమోదు చేసినట్లు అధికారులు తెలిపారు. 

మద్యం తాగి వాహనాలు నడపడాన్ని అరికట్టడం, రోడ్డు ప్రమాదాలను నివారించడం, న్యూ ఇయర్ వేళ ప్రజల భద్రతను నిర్ధారించడానికి ఈ ప్రత్యేక ఎన్‌ఫోర్స్‌మెంట్ డ్రైవ్ నిర్వహించబడింది. నిర్లక్ష్యంగా వాహనాలు నడపడం, రోడ్లపై బాధ్యతాయుతమైన ప్రవర్తనను ప్రోత్సహించడానికి ఉల్లంఘించేవారిపై కఠినమైన చర్యలు కొనసాగుతాయని పోలీసు అధికారులు హెచ్చరించారు. నూతన సంవత్సర వేడుకల సందర్భంగా బందోబస్తును విజయవంతంగా నిర్వహించినందుకు, మద్యం తాగి వాహనాలు నడిపే వారిపై చట్టాలను కఠినంగా అమలు చేసినందుకు హైదరాబాద్ సీపీ సజ్జనార్ అధికారులందరినీ అభినందించారు. హోం గార్డుల నుండి అదనపు పోలీస్ కమిషనర్ల వరకు ప్రతి అధికారి చేసిన కృషిని కొనియాడారు. టీమ్ స్ఫూర్తితో పనిచేయడమే హైదరాబాద్‌ను సురక్షితంగా, నిజమైన ప్రపంచ నగరంగా మారుస్తుందని సజ్జనార్  తెలిపారు.